Н.Наранбаатар: Мөнх тэнгэрийн дор орших түүхэн үндэстэн гэдгийг харуулахыг зорилоо

Үндэсний их баяр наадмын нээлтийн үйл ажиллагааг найруулсан Улсын драмын эрдмийн театрын ерөнхий найруулагч, Төрийн соёрхолт найруулагч Н.Наранбаатар нээлтийн арга хэмжээний талаар: 

"Наадмын нээлт "Би хэн юм бэ” гэсэн асуултаар эхэлж байгаа. Үзүүлбэрийн төгсгөлд “Би Монгол хүн” гэсэн агуулгыг хэлж байгаа. Дээл, гутал, бүс, малгайгаа өмссөн, энэ наадамд миний гэр бүл, худ ураг, хамаатан, найз нөхөд, нутаг зон олныхон бүгд цугларсан байна. Бид бол нэг үндэстэн. Мөнх тэнгэрийн дор орших түүхэн гайхамшигт үндэстэн гэдгийг харуулахыг зорилоо.

Наадмын нээлтийн үйл ажиллагаанд төрийн статустай бүх байгууллагууд, чөлөөт уран бүтээлчид, Зохиолын дуучдын холбоо, рок попын уран бүтээлчид оролцлоо. Энэ жил циркийн үзүүлбэрийг түлхүү оруулахыг зорьсон. Монгол цирк өөрөө гайхамшиг. Тиймээс циркийн сайхан үзүүлбэрүүдийг наадмынхаа үзүүлбэртэй нийлүүлээд хүргэхийг зорьсон. Үзэгч түмэнд хүрсэн болов уу гэж найдаж байна.

Хаалттай цэнгэлдэх хүрээлэнд нээлтийг хийе, наадмын нээлтийг орой үдэш хийвэл яасан юм бэ гэдэг. Бидний ялгамж ердөө энэ шүү дээ. Нартай 11.00 цагт ард түмнээ баярлуулна гэдэг монгол наадмын нээлтийн ялгамж гэж би хувьдаа ойлгодог. Энэ бол бидний онцлог. Нарлаг Монголын наран дор учир зүйгээ олоод үзнэ гэдэг нь гайхамшиг байх. Наадмын нээлт таалагдахгүй байж болно. Шүүмжлэх нь тэр хүний эрх. Бүх юм таалагдах албагүй шүү дээ. Хамгийн гол нь түмэн олон маань эндээс таашаал авч, баярлаж бахадсан бол тэр хүн бол монгол хүн байна" гэлээ.