Өнгөрсөн 10 жилийн хугацаанд гамшиг, осолд нийт 499 хүүхэд амиа алджээ

"Үер уснаас үрсээ хамгаалъя" аяны хүрээнд усны ослоос урьдчилан сэргийлэх хээрийн дадлага сургууль зохион байгууллаа. Аялал жуулчлал, амралт зугаалгын улирал эхэлсэнтэй холбогдуулан хүүхэд багачуудыг үер усны аюулаас урьдчилан сэргийлэх, аливаа эрсдэлд оруулахгүй хамгаалахын төлөө иргэн бүр сонор сэрэмжтэй, хариуцлагатай байхыг уриалсан "Үер уснаас үрсээ хамгаалъя" аяныг Монгол Улсын Шадар сайдын баталсан удирдамжийн дагуу зарлаад буй. Энэ хүрээнд ОБЕГ тэргүүтэй мэргэжлийн байгууллагууд хамтран үер усны аюулаас сэргийлэх, авран хамгаалах нэгдсэн арга хэмжээг өнөөдөр Тэрэлж дэх Мойлтын аманд зохион байгууллаа.

Шадар сайд С.Амарсайхан арга хэмжээг нээж хэлсэн үгэндээ “Монголчууд бид гал, усанд ам гарч болдоггүй гэдэг. Үнэхээр ч усны осол гэдэг хэдхэн мөч, хэдхэн хормоор хэмжигддэг аюул. Өнгөрсөн 10 жилийн хугацаанд гамшиг, осолд 499 хүүхэд амиа алдсанаас 241 нь усанд осолдсон гэсэн харамсалтай тоо баримт байна. Усны ослын шалтгаан нь хиймэл нуур, тогтоол усанд орох, хүүхдийг хараа хяналтгүй орхих, аялал, амралт зугаалгаар явах үедээ эцэг эх, асран хамгаалагч нарын хараа хяналт суларснаас гол, нуурын усанд орж амь эрсдэх тохиолдол дийлэнх хувийг эзэлдэг. Хором, мөчөөр хэмжигдэх гол усны ослын үед онцгой байдлын аврагчид тэр болгоныг амжиж очиж аврах боломж хомс. Иймд энхрий хайртай үрсээ үер усны аюулаас хамгаалах наад захын дадал хэвшил, арга замуудыг хэн хүнгүй мэддэг байх нь нэн чухал байна. ЯЛАНГУЯА ХҮҮХЭД, ЗАЛУУСЫГ БАГААС НЬ УСАНД СЭЛЖ СУРГАХ ТАЛ ДЭЭР ЭЦЭГ, ЭХЧҮҮД БОЛОН БОЛОВСРОЛЫН БАЙГУУЛЛАГУУД ОНЦГОЙ АНХААРЧ, АМЬДРАЛЫНХ НЬ БАЙНГЫН ХЭВШИЛ БОЛГОХ ХЭРЭГТЭЙ. Ийм ч учраас энэхүү аяныг зохион байгуулж, өнөөдрийн дадлага сургуулийг Та бүгдэд бодитоор хийж үзүүлж байгаа юм" хэмээн онцоллоо.

Цаашид усны ослын тохиолдлыг бууруулахад хүүхэд, өсвөр үеийнхний оролцоог нэмэгдүүлэх, аюул осолгүй амьдрах, аялах, амарч зугаалах нөхцөлийг бүрдүүлэх, хөндлөнгийн хараа хяналтыг сайжруулах зорилгоор олон нийтийг хамруулсан нөлөөллийн зорилтот арга хэмжээнүүд зохион байгуулах нь үр дүнтэйг холбогдох байгууллагууд хэлж байлаа.