ГЕГ-ын албан тушаалтнуудын гэрээс “Нүүрсний авлигатай холбоотой” их хэмжээний гадаад валют хураан авчээ

БНХАУ-ын 30 компани Монголоос нүүрсээ авч чадахгүй авлигад нь зовж байгаа тухай гомдолыг өөрийн улсын хуулийн байгууллагадаа гаргасан талаар мэдээллийг бид анхлан хүргэж байсан.

Ар Монголын албан тушаалтнуудын авлига, хээл хахууль, шуналын золиос болж байгааг Хятад компаниуд мэдэгдэж байсан бол манайхны авлигын үүр уурхайн эхлэлийг Эрүүгийн цагдаагийн алба, Авлигатай тэмцэх газар хамтран элчилж эхэлжээ.

Тухайлбал Монгол улсаас БНХАУ руу нүүрс тээвэрлэх зөвшөөрөл, үйл ажиллагаатай холбоотой Гаалийн байгууллага, мэргэжлийн хяналтын байгууллагыг тойрсон эрх мэдэл, албан тушаал, авлигын асуудал ил болж эхэлж байна. Хуулийн байгууллага Гаалийн ерөнхий газрын эрх бүхий албан тушаалтнуудыг БНХАУ-руу нүүрс тээвэрлэх үйл ажиллагаанд эрх мэдлээ урвуулан ашигласан хэрэгт холбогдуулан шалгаж эхэллээ.

Шалгалтын хүрээнд Гаалийн ерөнхий газар болон Гашуун сухайт дахь Гаалийн газрын эрх бүхий албан тушаалтнуудын орон байр, Нүүрс тээврийн чиглэлээр үйл ажиллагаа явуулдаг хэд хэдэн компанийн захирал, тэдгээрийн офиссын өрөө тасалгаанд өчигдөр буюу 09-ний өдөр нэгжлэг хийхэд эх үүсвэр нь тодорхойгүй их хэмжээний бэлэн мөнгө, гадаад валют илэрснийг авлигын холбогдолтой мөнгө байж болзошгүй гэж үзэж хураан авчээ.

Гаалийн байгууллагын албан тушаалтнууд, нүүрс тээврийн томоохон аж ахуйн нэгжүүдийг авлига өгөх, авах, татвар төлөхөөс зайлсхийх, мөнгө угаах зэрэг хэд хэдэн хэрэгт холбогдуулан шалгаж байгаа юм байна.  Гаалийн байгууллага, мэргэжлийн хяналт сүлбэлдсэн Нүүрсний экспортын үйл ажиллагааны чиглэлээр авлигын томоохон бүлэглэл, сүлжээ үүссэн гэж дүгнэх үндэслэл байгааг зарим эх сурвалж мэдээллээ.