Ковид-19 халдварын шинэ, илүү аюултай өсвөр гарч болзошгүйг ДЭМБ санууллаа

Дэлхийн эрүүл мэндийн байгууллагын тэргүүн Тедрос Аданом Гебрейесус  өнөөгийн вакцинууд хүчин мөхөсдөх ковид19 халдварын илүү аюултай шинэ өсвөр гарч магадгүйг сануулаад SARS-CoV-2 хаашаа ч алга болоогүй гэжээ.

Зарим бүс нутаг дахь цар тахалд хандах хандлага тус байгуулгын санааг зовоож байна. Тухайлбал, Африк, Номхон далайн баруун бүсэд нас баралтын тоо огцом нэмэгдэж байгаа. “Одоогоор цар тахал дууслаа гэж хэлж болохгүй. Нэг тэрбум хүн вакцинд хамрагдаагүй байна. Илүү хор хөнөөлтэй хувилбар гарч болзошгүй нөхцөлд ковид19 тулгамдсан аюул хэвээр байна" хэмээн  Гебрейесус  анхааруулжээ. 

 Энэтхэгт “COVID-19” халдварын шинэ тохиолдол баасан гарагт сүүлийн гурван сар орчмын хугацаанд анх удаагаа 4000 давсан бол бямба гарагт үл ялиг буурч, 3962-т хүрсэн талаар тус улсын эрүүл мэндийн яам мэдээлсэн байна.

Жонс Хопкинсын нэрэмжит их сургуулийн мэдээллээр, Энэтхэгт цар тахал дэгдсэнээс хойш халдварын 43 сая гаруй тохиолдол бүртгэгдэж, 500 мянга гаруй хүн нас баржээ. 

Дэлхийн хэмжээнд авч үзвэл, “COVID-19” халдварын 531 сая гаруй тохиолдол илэрч, 6.3 сая хүн нас барсан бол дэлхийн даяар нийт 11.66 тэрбум тун вакцин тариад байна.