“Сахал” Д.Эрдэнэбилэгтэй нууцаар уулзахыг завдсан хорих ангийн дарга Ч.Мөнх-эрдэнийг ажлаас нь чөлөөлөх үү?

Хорих 461-р ангийн эмнэлэгт хэвтэж байгаа сахал Д.Эрдэнэбилэгтэй нууц уулзалт зохион байгуулахыг завдсан НШШГГ-ын дарга Х.Оюунболдыг өнгөрсөн долоо хоногт үүрэгт ажлаас нь чөлөөлсөн. Тэгвэл түүнтэй үгсэн хуйвалдаж хорих ангийн эмнэлэгт байгаа Д.Эрдэнэбилэгтэй нууц уулзалт хийхээр доод албан тушаалтнууддаа дарамт шахалт үзүүлсэн гэх цагдан хорих 461-р ангийн дарга Ч.Мөнх-эрдэнийг ажлаас нь чөлөөлөх асуудал яригдаж байна.

Д.Эрдэнэбилэгт илт давуу байдал олгосон, эрх мэдэл, албан тушаалын байдлаа урвуулан ашиглаж, хоригдож байгаа хүнийг эргэхийг завдсан үндэслэлээр хорих ангийн дарга Ч.Мөнх-эрдэнийг ажлаас нь чөлөөлөх санал Д.Загджав даргад хүргэгдсэн гэдгийг эх сурвалж мэдээллээ.

Шүүхийн шийдвэр гүйцэтгэх ерөнхий газрын дарга Д.Загджав сахал Д.Эрдэнэбилэгт илт давуу байдал олгосон, нууцаар эргэхийг завдсан, бусдад дарамт шахалт үзүүлсэн гэх Ч.Мөнх-эрдэнийг ажлаас нь чөлөөлөх эсэхийг шийдэх юм. Тун удахгүй түүний асуудлыг дотоод хурлаараа хэлэлцэхээр төлөвлөөд байгаа юм байна.