Нүүрс тээврийн үнийг хэд дахин нэмэгдүүлсэн чингэлгийн хэрэгт манай талаас дараах хүмүүс холбогдсон байж болзошгүй

Манай улс энэ онд 36 сая тонн нүүрс экспортод гаргах зорилт тавьсан ч эхний улиралд ердөө 2,2 сая тонныг гаргасан. Нүүрсээ гаргаж чадахгүй байгааг цар тахал руу чихэж байсан ч үүний цаана асар их авлига байсныг БНХАУ-д явагдсан баривчилгаа харуулсан. Өнөөдөр өглөө бид БНХАУ-ын хөрөнгө оруулалттай 30 компани төрд шургалсан авлигачдыг дийлэхгүй нүүрсээ гацаагаад байгаа талаар мэдээлсэн.

Мөнгөн дүнгээр 85,3 тэрбум төгрөгийн 2,5 сая тонн нүүрс гацаад байгаа гэх гомдлыг Хятад компаниуд Элчин сайдын яам болоод Амрыг сахиулах хороондоо мэдэгдээд байгаа.

Тэгвэл хил дамнасан энэ их авлигын хэрэгт манай талаас Үндэсний тээврийн корпорацийн ТУЗ-ын гишүүн И.Шатархүү, Монголын авто тээвэрчдийн нэгдсэн холбооны удирдах зөвлөлийн дарга Д.Наранпүрэв нарын хүмүүс холбогдсон байж болзошгүйг эх сурвалж мэдээллээ. Үндэсний тээврийн корпорацийн ТУЗ-ын гишүүн И.Шатархүү нь зам тээврийн сайд Л.Халтартай ашиг сонирхол нэг гэдэг баримт удаа дараа ил болж байсан.

Энэ удаад "Үндэсний тээврийн корпораци"-ийн ТУЗ-ын гишүүн И.Шатархүү, Монголын авто тээвэрчдийн нэгдсэн холбооны удирдах зөвлөлийн дарга Д.Наранпүрэв нар нь БНХАУ-ын чингэлэг тээврийг хариуцан гүйцэтгэж байсан "Кос Ко" компанийн удирдлагуудтай үгсэн хуувилдсан байж болзошгүйг хэлж байна.

Ковид цар тахлын нөхцөл байдлын улмаас хил гаалийн нэвтрүүлэх чадвар муудсан хэдий ч ариутгал, халдваргүйжүүлэлт хийгдээд явж болох тээврийг олон сар тодорхойгүй байдлаар зогсоож, чингэлэг тээврийг зохион байгуулах нэрийн дор асар их хэмжээний авлигал хээл хахуулийг Монгол Хятад удирдах түвшний хүмүүс зарим нэг хувийн хэвшлийн этгээдүүдтэй үгсэн хуйвалдаж зохион байгуулсан талаар гомдол гарсаар байгаа ажээ. БНХАУ-ын тал уг гомдлын дагуу шуурхай ажил зохион байгуулж нэр холбогдсон дарга нарыг яаралтай баривчлан саатуулж арга хэмжээ авч, чингэлэг тээврийг зогсоож задгай тээврийг эхлүүлээд байна. Харин Монгол Улсын талаас одоог болтол ямар нэг арга хэмжээ авахгүй өдийг хүрлээ.