Хүүхдийн баярт зориулан багцалсан уут бэлэгт ойролцоогоор 412 грамм сахар агуулагдаж байна

Насанд хүрсэн хүний нэг өдрийн сахарын хэрэглээг 25 грамм гэж заасан байдаг. Тэгвэл хүүхдийн баярт зориулан багцалсан нэг уут бэлэгт ойролцоогоор 412 грамм сахар агуулагдаж байна. Хүүхэд өдрийн дотор уут бэлэгт байгаа бүхий л амттанг хэрэглэсэн гэж үзвэл насанд хүрсэн хүний сахарын  хэрэглээнээс даруй 16 дахин их юм. 

Сахарын агууламж өндөртэй хүнсний бүтээгдэхүүнийг нэг дор их хэмжээгээр хэрэглэхэд хүүхдэд цатгалан мэдрэмж төрүүлэн хоолны дуршлыг бууруулдаг. Улмаар шим тэжээллэг хоол хүнс идэхээс дургүйцэх, зөвхөн чихэрлэг хүнсний бүтээгдэхүүнийг идэх дуршилтай болж, шүдний өвчлөлд өртдөг.

 Иймд эцэг эхчүүд та бүхэн хүүхдэдээ бэлэг сонгохдоо сахарын агууламж өндөртэй хүнсний бүтээгдэхүүн худалдан авахаас аль болох татгалзахыг уриалж байна. Худалдаанаас ууттай бэлэг сонгож буй тохиолдолд багцалсан хүнсний бүтээгдэхүүний хадгалах хугацаа, чанар, аюулгүй байдал нь алдагдсан эсэхийг шалгаж авахыг Мэргэжлийн Хяналтын Ерөнхий Газраас мэдээллээ.