Тусгай хэрэгцээт болон энгийн 500 гаруй хүүхдийн хамтарсан гүйлтийн тэмцээн 6 дахь жилдээ зохион байгуулагдлаа

Энэ сарын 22-ны өдөр Үндэсний цэцэрлэгт хүрээлэнд тусгай хэрэгцээт 250 гаруй хүүхэд, сайн дураараа дэмжихээр ирсэн 250 гаруй хүүхэд гээд нийт 500 гаруй хүүхдийн нөхөрсөг гүйлтийн тэмцээн боллоо. Уг гүйлтийн тэмцээнийг “Ахиллис Монголиа” ТББ-аас зохион байгуулж, цагдаагийн байгууллагаас “Хөгжимтэй жагсаал” хийж, хүүхдүүдэд туслах “Хөтөч-цагдаа” ажиллуулан ДЭМЖЛЭГ ҮЗҮҮЛЖ, хүүхэд багачуудын аюулгүй байдлыг ханган ажиллаа.

 “Ахиллис Монголиа” ТББ-аас  хөгжлийн бэрхшээлтэй хүүхэд, багачуудын бие даах чадвар, өөртөө итгэх итгэлийг урт хугацааны гүйлт, алхалтаар сайжруулах зорилгоор жил болгон нийслэлийн тусгай хэрэгцээт 6 сургуулийн сурагчдын дунд хүүхдүүдийн гүйлтийн тэмцээнийг зохион байгуулдаг уламжлалтай.

 “Ахиллис хүүхэд” хөтөлбөрийн зохицуулагч Т.Наранцацралт:

Ахиллис Монголиа байгууллага нь спортоор дамжуулж тусгай хэрэгцээт хүүхдүүдийг нийгэмшүүлэх, өөртөө итгэх итгэлийг нь нэмэгдүүлэх, нийгэмд идэвхтэй иргэн болоход нь дэмжиж төрөл бүрийн үйл ажиллагаа явуулдаг. Энэ жил 6 дахь жилдээ болж байна. Ахиллис хөтөлбөрийн хүрээнд нийслэлд үйл ажиллагаа явуулж байгаа 6 сургуулийн сурагчдад биеийн тамирын хичээл дээр хийдэг алхалт, гүйлтийнх нь амжилтыг ахиулаад төрөл бүрийн арга хэмжээ зохион байгуулж, спортын хэрэгсэл, хэрэгцээт хичээлийн хэрэгслээр нь урамшуулдаг.

Энэ хичээлийн жилийн хаалтын ажиллагаа болгож “Хөгжилтэй гүйлт” арга хэмжээгээ ийнхүү зохион байгууллаа. Уг арга хэмжээнийг дэмжин сайн дураараа мөн 300 орчим энгийн хүүхэд хамт гүйж байгаа. Хамтдаа амжилт үзүүлж чадна гэдгийг харуулахыг зорьж байна. Өнгөрсөн хугацаанд 6 жилийн хугацаанд давхардсан тоогоор 1300 орчим тусгай хэрэгцээт хүүхдүүд гүйжээ. Өнөөдрийн арга хэмжээнд дэмжин оролцсон цагдаагийн байгууллага, 361 брэнд, имарт гээд олон дэмжигч нартаа талархаснаа илэрхийлье. Хамтдаа ялгаварлан гадуурхалгүй, тэгш боломжийг бүрдүүлсэн нийгмийн бүтээхийн төлөө уриалж байна.

ЦАГДААГИЙН ЕРӨНХИЙ ГАЗАР