Автомашин, орон сууцтай иргэдэд хүүхдийн мөнгө олгохгүй байхыг ОУВС зөвлөлөө

Монгол улсын нийгэм эдийн засгийн өнөөгийн дүр зурагт ОУВС-гийн ажлын хэсэг дүгнэлт хийгээд буцлаа. Инфляци нь таазандаа тултал өсчихсөн өнөөгийн нөхцөл байдал ирэх онд ч үргэлжилж иргэд үнийн өсөлтийн дарамтад улам бүр нэрвэгдэх эрсдэлтэйг сануулж байна. Мөн ирэх онд улсын эдийн засгийн нөхцөл байдал тийм ч хурдан дээрдэхгүй гэж үзлээ. Учир нь засгийн газрын баталгаатай томоохон бондын өр төлбөрүүд төлөгдөх хуваарьтай тул энэ асуудалдаа онцгой анхаарах хэрэгтэйг засгийн газарт анхаарууллаа. 

 Үүнээс гадна Монгол улс халамжийн бодлогоо хавтгайруулж байгаа нь эдийн засагт хүндээр тусгаж байгааг мэргэжилтнүүд хэлсэн юм. Тиймээс хүүхдийн мөнгөнөөс эхлээд олгож байгаа халамжуудаа зөвхөн зорилтот бүлгүүдэд хүргэхэд онцгой анхаарах зөвлөмж өгчээ. Тухайлбал автомашин орон сууцтай, орлого өндөртэй айл өрхүүдэд хүүхдийн мөнгө олгохоос илүүтэй амьжиргааны баталгаажих түвшин доогуур иргэддээ түлхүү дэмжлэг олгох нь зүйтэй гэсэн юм.