Монгол хүний хөдөлмөрийн хөлс цагт 0.77 цент буюу олон улсын дунджаас 10 дахин бага байна

Монгол хүний хөдөлмөрийн үнэлэмж дэлхийн 170 гаруй орноос сүүл мушгиж байна. Хамгийн сүүлд 2020 онд хөдөлмөрийн хөлсний доод хэмжээг шинэчлэн тогтоохдоо 420 мянган төгрөг буюу 1 цагт 2500 төгрөгөөр тогтоож байлаа. Тухайн үеийн  ханшаар 1 доллартай тэнцэж байсан бол үнийн өсөлт, инфляцийн хөөрөгдөл, валютын ханшаас үүдэлтэй өнөөдөр 0,77 цент болон буурчээ. Монгол залуус хамгийн ихээр зорьж байгаа БНСУ-д нэг цагийн хөдөлмөрийн хөлс 8 доллартай тэнцэж байна. Үнийн өсөлт өдрөөр биш цагаар нэмэгдсээр байхад иргэдийн цалин, хөдөлмөрийн хөлсийг нэмэгдүүлэх шийдлийг хуулиар халхавчилж жил дамнуулан хойшлуулж байна. Тодруулбал тухайн жилийн улсын нэгдсэн төсвийг батлахаас өмнө хөдөлмөрийн хөлсний доод хэмжээг шинэчлэн тогтоож чадаагүй бол дараагийн дараа жилээс нэмэх асуудлыг хөндөх хуулийн заалт үйлчилж байгаа юм. Тиймээс УИХ хуулийн энэ заалтаа эргэн харах шаардлагатайг МҮЭХ-ны ерөнхийлөгч С.Эрдэнэбат онцоллоо. 

МҮЭ-ийн холбооноос цар тахлын үед Хөдөлмөрийн хөлсний доод хэмжээ (ХХДХ)-г шинэчлэн тогтоох саналыг хуулийн хүрээнд тавьж байсан боловч 2021 онд УИХ-аас ХХДХ-ний тухай хуульд өөрчлөлт оруулж нэмэгдүүлэх боломж гарцыг үгүй хийгээд байгааг хэлж байгаа юм.

Өнөөдөр ХХДХ-г хоёр жилийн турш буюу 2023-2024 онуудад зөвхөн 500 мянган төгрөгт хүргэх саналыг ажил олгогч болон Засгийн газраас гаргаж байсан ч МҮЭ-ийн холбооноос хөдөлмөрийн хөлсний доод хэмжээг 2023 оны 1 дүгээр сарын 1-нээс 600 мянган төгрөгт хүргэх, 2024 онд дахин нэмэгдүүлэх, ингэхдээ 2023 оны нэгдүгээр улиралд багтаан хэлэлцэж шинэчлэн тогтоох саналыг оруулсан ба удтал мэтгэлцсэний эцэст МҮЭ-ийн холбооны саналыг хэлэлцэж түншлэгч талуудын олонхын саналаар ХХДХ-г 550 мянган төгрөг байхаар баталсан юм. Ингэснээр нэг цагийн хөдөлмөрийн хөлс 1 доллараар үнэлэгдэхээр болж байгаа юм.