Т.Доржханд: Хаалттай хуралдаан дээр УИХ-ын гишүүн С.Ганбаатар хулгайчдыг хамгийн их өмөөрсөн

Энэ сарын 5-ны өдрийн 12.00 цагт төв талбай дээр тайван жагсаал зохион байгуулахаа УИХ-ын гишүүн Т.Доржханд мэдэгдсэн. Өөрсдөө өөрчил, эсвэл тар гэдэг уриатай тайван жагсаалыг зохион байгуулахгүй бол засаглалтын тогтолцоо өнөөгийн нийгмийн амьдралд хамгийн том сөрөг үр дагавар авч ирж байна гэж тэрээр мэдэгдсэн юм. Мөн тэрээр мэдээллийнхээ үеэр

“Манай ангийн нөхдүүд Хөгжлийн банкны хулгайчдаа хамгаалж, түдгэлзүүлэхгүй авч үлдлээ. Энэ шударга ёс юм уу. Бид хулгайтай тэмцэх ёстой биз дээ. Хулгайлсан бол хулгайч гэдгийг нь хэлэх ёстой. Гэтэл УИХ-ын гишүүд нь хулгай хийснийг ярих гэтэл хаалттай хуралдана гэж хамгаалсан. Ингэх ямар хэрэг байна аа. УИХ-ын гишүүн С.Ганбаатар хулгайчдыг хамгийн их өмөөрч үг хэлсэн байна. Яагаад гэвэл, өөрөө Хөгжлийн банкны зээлтэй холбоотой юм байна. Гэтэл ард түмэн түүнийг шударга гэж өргөмжилдөг. Тэр шударга нь тэгвэл хаана байна вэ. Мөн Н.Алтанхуяг гишүүн хамгийн их сандарч тэвдсэн. Худлаа гэвэл, нэр бүхий дөрвөн гишүүнийг түдгэлзүүлэх асуудлыг ярьсан хаалттай хуралдааны протокол дээр бичигдсэн байгаа" гэлээ.