Б.МӨНХСОЁЛ: ХЭСЭГ БҮЛЭГ ХҮМҮҮС ӨӨРСДИЙН ЭРХ АШГИЙГ ХАМГААЛАХ МЕХАНИЗМЫГ БҮРДҮҮЛЧИХ ВИЙ

Үндсэн хууль бол Монголын нийгмийн суурь багана гэж хэлэхэд хэтрүүлсэн болохгүй байх. Энэ жилийн хувьд Монголчууд гэрийнхээ баганыг сайжруулах уу, муужруулах уу гэсэн сонголтон дунд байна. Үндсэн хуулийн дордуулсан долоон өөрчлөлт засаглалын хямрал нүүрлэхэд нөлөөлсөн гэж улс төрийн хүрээний зарим нөхөд ярьдаг. Тиймээс ч Үндсэн хуулийн өөрчлөлтийн тухай сүүлийн жилүүдэд идэвхтэй ярьсаар ирсэн биз.

Харин зарим хуульч, судлаачдын хувьд одоогийн эрх баригчид Үндсэн хуульд гар хүрэх чадамж байна уу, үгүй юу гэдэгт эргэлзээтэй гэдгээ илэрхийлсээр ирсэн билээ. Тухайлбал, Хуульч, судлаач Х.Бат-Ялалт Үндсэн хуулиа ядахдаа бүтнээр нь уншаад, хэрэглэж үзээгүй байж, шууд л өөрчлөх ёстой мэтээр яриад байгаа хүмүүсийг ойлгохгүй байгаа тухайгаа ярьсаар ирсэн. Тэрбээр Үндсэн хуульд зарим нэг өөрчлөлт хэрэгтэй. Гэхдээ одоогийн эрх баригчдын хувьд Үндсэн хуульд гар хүрэх чадамжгүй гэж үздэг судлаачдын нэг юм.

Тэгвэл Үндэсний Стратегийн хүрээлэнгийн захирал Б.Мөнхсоёл news.mn вэб сайтад өгсөн ярилцлагаараа ч гэсэн Үндсэн хуулийн өөрчлөлтөнд хайнга хандаж болохгүй, хэсэг бүлэг хүмүүс өөрсдийн эрх ашгийг хамгаалах механизмыг бүрдүүлчих вий гэсэн санаа зовнил байдаг тухайгаа ярьсан байдаг. Тэрбээр энэ тухайгаа "Үндсэн хуульд зарчмын шинжтэй хэд хэдэн өөрчлөлт хийх шаардлагатай. Тухайлбал, хууль тогтоох болон гүйцэтгэх засаглалын зааг ялгаг бий болгох, хариуцлагын механизмыг бий болгох ёстой. Гэхдээ маш олон талын оролцоог хангах, ялангуяа мэдлэгтэй, мэдээлэлтэй хүмүүс болон хүчнүүдийн оролцоог хангаж Үндсэн хуульд өөрчлөлт оруулахгүй бол чоно борооноор гэдэг шиг өөрчлөлт оруулах процессыг далимдуулж хэсэг бүлэг хүмүүс өөрсдийн эрх ашгийг хамгаалах механизмыг бүрдүүлчих вий гэсэн санаа зовнил, надад байна. Үндсэн хуулийг бид өөрчлөх ёстой гэж маш олон жил ярьсан хэрнээ өөрчлөх болохоороо 21 хоног зарцуулна гэдэг бол маш их далд санаа агуулсан байж болохуйц үйлдэл болох байлаа" гэжээ.