Тоормос нь ажиллагаагүй болсон 2892 тээврийн хэрэгсэл замын хөдөлгөөнд оролцож байна

Улсын хэмжээнд 1.4 сая тээврийн хэрэгсэл бүртгэлтэй байдаг байна. Гэтэл өнгөрөгч 2021 онд ердөө 50 хувь нь буюу 779 мянган тээврийн хэрэгсэл техникийн бүрэн бүтэн байдлыг шалгах үзлэг, оношлогоонд хамрагдсан байна. 

Авто Тээврийн Үндэсний Төвөөс 161 стандартыг мөрдлөг болгон шалгалт хийдэг. Үзлэгт хамрагдсан 779 мянган тээврийн хэрэгслээс 14524 тээврийн хэрэгсэл ямар нэгэн байдлаар стандартын шаардлага хангаагүй нь анхаарал татна. Гэтэл стандартын шаардлага хангаагүй гэх 2892 тээврийн хэрэгслийн тоормосны систем ажиллагаагүй нь шалгалтаар тогтоогдсон нь бүр ч илүүтэй аюул, ослын дохио болсон тоон баримт юм. Гэтэл эдгээр 14 мянган тээврийн хэрэгсэл өнөөдөр замын хөдөлгөөнд оролцоод явж байгаа нь осол, тэр дундаа жирийн иргэн гэмтэж бэртэх, цаашлаад амь насаа алдах эрсдлийг бүрдүүлсэн үйлдэл гэж хэлж болох юм. 

Түүнчлэн Монгол Улсын замын хөдөлгөөний дүрэмд баруун гар талаар зохицуулна гэж заасан. Гэтэл манайд зам тээврийн хөдөлгөөнд оролцож байгаа тээврийн хэрэгслийн 50-иас дээш хувь нь буруу талдаа рультэй гэсэн статистик байна. Энэ нь зам тээврийн ослын бас нэгэн шалтгаан нөхцөл болдог. Жолоодох хүрд баруун талдаа байна гэдэг нь өөдөөс ирж байгаа тээврийн хэрэгслийн гэрлийн гялбааг ойлгохгүйгээс гадна баруун гар талд явж буй явган зорчигчийг харахгүй байх зэрэг сөрөг үр дүнтэй юм.