Эдийн засгийн тэргүүлэх салбаруудад хэрэгжих төсөл хөтөлбөрийг санхүүжүүлэх, импортыг орлох, экспортын орлогыг нэмэгдүүлэх үйлдвэрлэл, үйлчилгээг хөгжүүлэхэд шаардлагатай хөрөнгийн эх үүсвэрийг бүрдүүлэх нь Хөгжлийн банкны зорилго. Гэтэл зорилго хазайж, эрх мэдэл, албан тушаалтнуудын хүслийг гүйцээх хэрэгсэл нь Хөгжлийн банк болж хувираад 11 жилийн нүүр үзжээ. Энэ хугацаанд Монгол Улсад үйлдвэрлэл өргөжиж, ажлын байр нэмэгдэх, үүнийг дагаад иргэдийн амьдрах нөхцөл сайжран эдийн засаг бүхэлдээ сэргэх боломжтой байсан бизээ. Гэтэл энэ он жилүүдийг улс төрийн нөлөөлөл бүхий хэдхээн хүнд алдчихсан нь даанч харамсалтай...
Монгол Улсын Ерөнхийлөгч асан Х.Баттулгаас эхлээд улс төрийн нөлөө бүхий эрхмүүд Хөгжлийн банкнаас олгох зээлд нөлөөлж, их хэмжээний бага хүүтэй зээлийг хамаарал бүхий этгээдүүдээрээ дамжуулан авсан нь тодорхой болсоор байна. Албан тушаал эрх мэдлээрээ далайлган авсан зээл нь хар дээр цагаанаар бичигдсэн зориулалтаасаа тэс өөр зүйлд зарцуулагдсан бөгөөд авсан зээлээ ч эргүүлэн төлөлгүй өнөөдрийг хүртэл Монгол улсыг хохироосоор байна.
Төслөөсөө төөрсөн зээлүүд...
Хуурай сүүний үйлдвэр барина гэчихээд хувийнхаа орон сууцны бизнесийг тэтгэчихсэн, ясны үйлдвэр барина гээд алтны дэлгүүр нээчихсэн, шувууны аж ахуй эрхэлнэ гээд уурхай худалдан авч, мөрийтэй тоглочихсон гээд төслөөсөө төөрсөн зээлүүд дийлэнхи нь байна.
Авсан зээлээ зориулалт бусаар ашигласан, өрөө төлөх хугацаа хэтэрсэн найдваргүй зээлдэгчдийн нийт өрийн хэмжээ 1.8 их наяд төгрөг. Хөгжлийн банкнаас зээлдэгчдийн мэдээллийг олон нийтэд ил болгосноос хойш 3 сарын хугацаанд 150 гаруй тэрбум төгрөгийн эргэн төлөлт хийгдээд байгаа ч үлдсэн зээл нь хэзээ төлөгдөх нь эргэлзээтэй хэвээр байна.
Хөгжлийн банкны зээлийн ард эрх баригч МАН-ын улс төрчид байгаа нь ил болсон. Тиймээс ч МАН-ын генсек Д.Амарбаясгалан Хөгжлийн банкны зээлд холбогдсон гишүүдийг намын гишүүнээс түдгэлзүүлнэ /”Өөрөөр нь төлүүлье” хэлэлцүүлэг 2022.02.11/ гэдгээ албан ёсоор мэдэгдсэн. Үүнээс хойш 2 сар гаруй хугацаа өнгөрчээ. Гэвч хараахан хариуцлага тооцож эхлээгүй байна. Харин ойрхноос Х.Ганхуяг, Г.Амартүвшин, Ё.Баатарбилэг болон Н.Алтанхуяг нарыг шалгуулахаар болсон бололтой. Үүний цаана С.Бямбацогт, Х.Дамдинням, Н.Билэгт, А.Сүхбат, Барилга хот байгуулалтын дэд сайд асан Ш.Лхамсүрэн, Ш.Үнэнбат гээд олон хүн сугарч үлдэж байгааг сануулъя.
Эцэст нь хэлэхэд, Монгол Улсын хөгжлөөс хулгайлсан 11 жилийг буцаах боломжгүй ч дараагийн ээлжийнхэнд боломж олгохгүйн тулд Хөгжлийн банкны зээлд нөлөөлсөн улс төрч, албан тушаалтнуудад хариуцлага тооцож ажиллахыг эрх баригч намын эрх баригчдаас хүсье...
Улаанбаатар °C 
Сэтгэгдэл (1)