Хөнгөн галт тэрэг явуулах төсөлд МАН-ын бүлэг ажлын хэсэг байгууллаа

УИХ дахь МАН-ын бүлэг өнөөдөр /2022.04.25/ хуралдаж, хоёр асуудал хэлэлцлээ. Хурлын шийдвэрийн талаар УИХ дахь МАН-ын бүлгийн дарга Д.Тогтохсүрэн, дэд дарга Ж.Сүхбаатар, Ажлын албаны дарга С.Далхаасүрэн нар сэтгүүлчдэд мэдээлэл өглөө.
Бүлгийн дарга Д.Тогтохсүрэн “Нэгдүгээрт, Зөрчлийн тухай хуулийн шинэчилсэн найруулгын төсөл болон Зөрчлийн хэрэг хянан шийдвэрлэх тухай хуулийн төслүүдийг хэлэлцэж, дэмжих нь зүйтэй гэдэгт бүлгийн гишүүд санал нэгдлээ. Дээрх хуулийн төслүүдийг ажлын хэсэг байгуулж, дүгнэлтийг дахин бүлгээр хэлэлцэх шаардлагатай гэж үзсэн.
Хоёрдугаарт, өнгөрсөн долоо хоногийн Төсвийн байнгын хорооны хуралдаан болон УИХ-ын нэгдсэн чуулганаар хэлэлцэж амжаагүй тогтоолын төслийг хэлэлцлээ. Өнгөрсөн долоо хоногт Улсын төсвийн 2022 оны тухай хууль болон түүнийг дагасан 10 хууль, дөрвөн тогтоолын төслийг УИХ-д Засгийн газраас өргөн барьсан. Үүнд “Шинэ сэргэлтийн бодлого”-ыг хэрэгжүүлэх хүрээнд Засгийн газраас зээлийн баталгаа гаргахтай холбоотой тогтоолын төсөл байсныг энэ удаагийн бүлгийн хуралдаанаар нухацтай хэлэлцлээ. Тогтоолын төслийн нэгэн чухал хэсэг нь нийслэлийн түгжрэлийг бууруулахтай холбоотой асуудал учраас нийслэлийн удирдлагуудыг оролцуулж, LRT төслийн танилцуулгыг сонсож, асуулт асууж, хариулт авлаа. МАН-ын бүлгээс төслийг дахин ярилцах шаардлагатай гэж үзсэн. Үүнээс гадна Тавантолгойн дулааны цахилгаан станцтай холбоотой асуудлыг шийдвэрлэх шаардлагатай байгаа. Эдгээр хоёр асуудлыг Төсвийн хуулийг дагуулан яарч шийдвэрлэх боломжгүй тул бүлгээс ажлын хэсэг гарч, Засгийн газартай хамтарч ажиллах шаардлагатай хэмээн гишүүдийн олонх санал нэгдлээ” гэв.