Жилд 20-30 хайгуулын зөвшөөрөл олгодог байсан бол "Шинэ сэргэлтийн бодлого"-ын хүрээнд энэ жил 400 зөвшөөрөл олгоно

Хоёр жил гарны хугацаанд цар тахалд сөхөрсөн улсын эдийн засаг сэргэж амжилтгүй гадаад дотоод хүчин зүйлд нухлуулсаар зарим эдийн засагчдын хэлдэгчлэн сэхээний тасагт хүндхэн байгаа. Доллар ховрын эд болж төгрөгийн ханш өдөр ирэх тусам суларсаар. Тэгвэл эрх баригч намын дарга, Засгийн газрын тэргүүн “Шинэ сэргэлтийн бодлого” тодорхойлж хүндхэн эдийн засгаа эргэн сэргээнэ гэж томоохон зорилт тавьсан. Гэвч манай улс дотооддоо үйлдвэрлэлээ нэмэгдүүлж гадаад руу гаргана гэх гялтайх бараа бүтээгдэхүүн байхгүй тул өнөөх л уул уурхайгаа эрчимжүүлж газрын баялагаа гадаад руу эрчимтэй экспортлохоос өөр гарцгүй. Энэ ч үүднээс засгийн газар уул уурхайг эрчимжүүлэх чиглэл өгч аймаг бүрт мэргэжлийн хүмүүс хэлэлцүүлэг өрнүүлж байна.

Өнөөдрийн байдлаар улсын хэмжээнд уул уурхай эрдэс баялгийн салбарт 2640 зөвшөөрөл олгогдсон байна. Үүнээс хайгуулын 894 зөвшөөрөл олгогдсон байдаг бол үлдсэн 1746 нь ашиглалтын лиценз юм.

Улсын хэмжээнд жилд хайгуулын чанартай 20-30 орчим тусгай зөвшөөрөл олгодог байсан бол энэ жилд 400-500 зөвшөөрөл олгохоор болжээ. Энэ мэтчилэн уул уурхайг эрчимжүүлж эдийн засгаа богино хугацаанд тэлж, валютын урсгалаа нэмэгдүүлнэ гэж засгийн газар үзэж байгаа юм.