Шүүхээс Д.Эрдэнэбилэг, М.Мөнхбаатар нарыг цагдан хорих шийдвэр гарлаа

Худалдаа Хөгжлийн банкны ТУЗ-ийн дарга Д.Эрдэнэбилэгийг 30 хоног цагдан хорих шийдвэрийг Сүхбаатар дүүргийн Эрүүгийн хэргийн анхан шатны шүүхээс гаргалаа. Шүүх хурал өнөөдөр /2022.04.21/ тус шүүхэд эхэлсэн юм. Харин шүүх хуралд Д.Эрдэнэбилэг өөрөө оролцоогүй аж.

“Хөтөл” ХХК Монгол Улсын Хөгжлийн банкнаас 2012 оны 10 сарын 16-ны өдөр 61,265,000 ам.долларын зээл авах үед тус компанийг үүсгэн байгуулагч, хувьцаа эзэмшигчээр бүртгэлтэй байсан Р.Мөнхтуул, Д.Мишиг, Г.Энхбаяр нар нь “Кью Эс Си” ХХК-ийн Төлөөлөн Удирдах Зөвлөлийн даргаар ажиллаж байсан Д.Эрдэнэбилэгийн нэгдмэл сонирхолтой аж ахуйн нэгжүүдэд түүний удирдлагад ажиллаж байсан, мөн “Кью Эс Си” ХХК нь Монгол Улсын Хөгжлийн банкнаас 2014 оны 12 сарын 01-ний өдөр 71,300,000 ам.долларын зээл авах үед Д.Эрдэнэбилэг нь тус компанийн Төлөөлөн Удирдах Зөвлөлийн даргаар ажиллаж байсан бөгөөд “Хөтөл” ХХК, “Кью Эс Си” ХХК-ууд Д.Эрдэнэбилэг болон түүний хувьцаа эзэмшдэг Худалдаа Хөгжлийн банктай нэгдмэл сонирхолтой болохыг хууль хяналтын байгууллага тогтоосон гэх мэдээлэл тухайн үед гарч байсан юм. 

“Хөтөл” ХХК, “Кью Эс Си” ХХК-ууд нь Монгол Улсын Хөгжлийн банкнаас авсан зээлээр Худалдаа Хөгжлийн банк, Улаанбаатар хотын банк дахь зээлүүдээ төлж зориулалтын бусаар зарцуулсан, түүнчлэн зээлийн гэрээний үүргээ биелүүлээгүйгээс төрд их хэмжээний буюу 488 тэрбум төгрөгийн хохирол учруулсан байж болзошгүй хэргээр түүнийг шалгасан юм. 

Эргэн сануулахад АТГ-ын мөрдөгчид Д.Эрдэнэбилэгийн Хан-Уул дүүрэгт байрлах гэрт болон Сүхбаатар дүүрэгт байрлах Худалдаа хөгжлийн банкны төв оффист нэгжлэг хийж, санхүүгийн баримтууд хураан авсан юм.