Цөөхөн МОНГОЛЧУУД билээ бид. Даанч нэгэндээ хайргүй юм

“Зам тээврийн ослын хохирогч нь бага насны хүүхэд байжээ” гэсэн мэдээтэй өглөө заримдаа биднийг угтдаг. Тухайн үед сэрд хийн айн цочирдож, харамсан, болгоомж,  сэрэмж, хариуцлага даанч яав даа гэж халагладаг ч төд удалгүй л мартаж, зарим үед мэдсээр атал өөрсдөө ч хэн нэгнийг хохироох нөхцлийг бүрдүүлчихсэн явах нь бий. 

Аливаа зүйл энгийнээс, багаас эхэлдэг лугаа. Яарч сандран, аль эсвэл залхуурч нүд хуурсан үйлдэл хийж суудлын бүсээ зүүгээгүйгээс ч хожмын харамсал, хэн нэгний харуулсын эзэн болчих вий гэж хэн ч боддоггүй байх. Зүгээр л азанд найдсан, хэнэггүй үйлдлүүд... Хэзээ ч өөрт нь, хайртай түүнд нь тохиолдохгүй юм шиг. 

Цөөхөн МОНГОЛЧУУД билээ бид. Даанч нэгэндээ хайргүй юм. 

Өнгөрөгч 2021 онд 1479 зам тээврийн осол бүртгэгдсэнээс согтуугаар үйлдэгдсэн зам тээврийн ослын улмаас 106 хүн амь насаа алдаж, 203 хүн гэмтжээ. Зөвхөн согтуугийн улмаас шүү дээ. Дайн биш дээ 

Гэтэл тэр ондоо согтууруулах ундаа хэрэглэсэн 39480 иргэнийг цагдаагийн байгууллага илрүүлж, арга хэмжээ авсан гэх. Энэ 40 мянган согтуу иргэний тоо өмнөх оныхоос 47.7 хувиар өссөн, харин илрээгүй тохиолдлууд хэд бол?  

Дээр дурьдсан зөвхөн согтуугаар үйлдэгдсэн ослын улмаас 91 явганаар зорчиж байсан иргэн амь нас, эрүүл мэндээрээ хохирчээ. 

Харин энэ он гарсаар эхний улирлын байдлаар 11700 зөрчлийг гудамж замын шалгалтаар илрүүлсэн байна. 

Мөн 321 осол бүртгэгдсэний 57 нь согтуурсан үедээ замын хөдөлгөөнд оролцсон зөрчил илэрсэн бол 25 эрдэнэт Монгол хүн амь насаа алджээ. 

 Хожмын нэгэн өдөр өөрийн биеийг буруутган, өрөөлийн зүрхэнд зүхэгдэхгүйн тулд нэгэндээ хайртай байя, хариуцлагатай байя. 

Тавхан хором хүлээ, анхаар...