Сангийн сайд болон дэд сайдаар ажиллаж байх хугацаанд Ч.Хүрэлбаатар, Х.Булгантуяа нар Хөгжлийн банкны зээлийн эргэн төлөлтөд зохих ёсны арга хэмжээнүүдийг авч байсан бол өнөөдөр Хөгжлийн банкны чанаргүй зээл өндөр хувьд хүрэхгүй байх байсан нь тодорхой. Өөрөөр хэлбэл, чанаргүй зээлүүд гэнэт бий болчихоогүй нь лав. Засгийн газраас томилогдсон дээрх албан тушаалтнууд хуулийнхаа хүрээнд хяналт, шалгалтаа тавьж хангалттай ажиллаагүйд хариуцлага яригдах учиртай.
2017 онд Хөгжлийн банкны тухай хуульд өөрчлөлт оруулж, Сангийн яам хуулиар хяналт тавих үүрэгтэй болсон.
Гэвч тэр үед Сангийн сайдаар ажиллаж байсан Ч.Хүрэлбаатар, мөн дэд сайд нь байсан Х.Булгантуяа нар хариуцсан ажилдаа "хоноцын" сэтгэлээр хандаагүй байсан бол өнөөдөр тус банкны үйл ажиллагаа муугүй биш байх байв. Тиймдээ ч олон нийтийн зүгээс хариуцлагыг албан тушаалнуудаас нэхэж, шаардаж байна.
Сангийн сайд асан Ч.Хүрэлбаатар Хөгжлийн банкны асуудалд хариуцлага алдсан эсэхээ шалгуулахад бэлэн гэдгээ илэрхийлсэн бол дэд сайд асан Х.Булгантуяагийн хувьд ийн жиргэжээ. Тэрбээр "2020 оны дөрөвдүгээр сард Хөгжлийн банк Сангийн яамны харьяа болж ирсэн. Тэр болтол ЗГХЭГ-ын харьяа байсан. Одоо бүх луйврыг нь харъяалалгүй яамны дэд сайдад нь үүрүүлье гэж байгаа бол бодож" гэжээ.
Мөн тэрбээр өнгөрсөн сард зохион байгуулагдсан Хөгжлийн Банкны асуудлаарх нээлттэй сонсголыг үеэр дараах байр суурийг илэрхийлж байв.
УИХ-ын гишүүн Х.Булгантуяа: Хөгжлийн Банкны чанаргүй зээлийн талаар хангалттай ярилаа. Ийм хэмжээнд очсон банкийг одоо хэнийг ирж удирд гэх вэ. Гадаадад ажилгүй байгаа хүн л ирдэггүй юм бол өөр ирж ажиллах хүн байхгүй. Зээл авсан хэдэн хүнийг улс орноороо барьж идэхээ шахаж байх шиг байна. Тус банкнаас төрийн өмчит компаниудын урсгал зардалд хөрөнгө гаргасан байсан. Ямар хууль эрх зүйн хүрээнд гаргасан нь тодорхойгүй. Цаашид яах вэ дарга нар аа. Бид Хөгжлийн банкны зээлийг гадаадад төлөх ёстой. Эргэн төлөлтийн Хөгжлийн Банк өөрөө төлж чадахгүй гэвэл улсын төсвөөс төлөх юм уу.
Олон компанийг чанаргүй зээлдэгч ангилалд оруулсан байна. КОВИД гарах хүртэл зээлээ төлөөд явж байсан компаниудад дахин зээл төлөх хуваарь гаргаж өгч болохгүй юу. КОВИД гарсанд, урд хил хаагдсан, Орос Украины дайн болсонд хувийн хэвшлүүдийг буруу байхгүй. Эдгээр компаниудын дансыг хааж, бизнесийг нь зогсоолоо. Тэгэхээр танай эргэн төлөлт хийгдэх юм уу.
Барьцаа хөрөнгийг эсвэл цементийн үйлдвэрийг нь авлаа. Та нар цементийн үйлдвэр ажиллуулах юм уу. ТОСК-ийн менежментийг сайжруулж, эргэн төлөлтийг нь нэмэгдүүлж чадахгүй байгаа.
Активын удирдлагын тухай хууль манайд батлагдаагүй. Тэгэхээр энэ бүх чанаргүй зээл, барьцаа хөрөнгө, том бизнесүүдийг хэрхэн хууль эрх зүйн орчин олоо хүртэл тодорхойгүй байгаа.
Хөгжлийн Банкны нийт зээлийг 1/3-ийг нь төрийн өмчит компаниуд авсан. Гэтэл одоо зээлийг нь улсын төсөвт шилжүүлнэ гэж ярьж байна. Яагаад төрийн өмчит компаниудын авсан зээлийг татвар төлөгчдийн мөнгөөр төлнө гэж. Мөн танайх яагаад ялгаатай зарчмаар зээл олгосон юм бэ. Заримд нь гурван хувийн хүүтэй, заримд нь долларын хүүтэй зээл олгосон байсан" гэж хээв нэг ярьсан нь ч анхаарал татна. Хэрэв Сангийн дэд сайдаар ажиллаж байх хугацаандаа үүнийгээ ярьж, хэлж байсан бол өнөөдөр байдал өөр байх байсан биз ээ.
Улаанбаатар °C 
Сэтгэгдэл (0)
Сэтгэгдэл бичигдээгүй байна