АНУ дах инфляцид Путин буруутай гэжээ

АНУ-ын Ерөнхийлөгч Жо Байден нь улсад нь инфляц сүүлийн 40 жил үзэгдээгүй өндөр түвшинд хүрсний гол буруутны нэрлэжээ. Тэрээр “Өнөөдөр бидэнд ирсэн инфляцын талаарх мэдээлэлтэй танилцаж үзэхэд гуравдугаар сард болсон үнийн өсөлтийн 70 хувь нь Путинээс болж өссөн бензиний үнэтэй холбоотой байсан” гэжээ.

Жо Байдены Ардчилсан нам арваннэгдүгээр сард болох Конгрессын сонгуульд бэлдэх ажлын хүрээнд АНУ-д шатахуун, хүнсний бүтээгдэхүүний үнэ өсөж, инфляц 1981 оноос хойш үзэгдээгүй хамгийн өндөр хэмжээнд хүрсэн гол буруутан нь ОХУ-ын Ерөнхийлөгч Путин гэж шууд нэрлэдэг болоод сар орчим болж байна. 

Харин экс Ерөнхийлөгч Дональд Трамп болон түүний Бүгд найрамдах нам нь Жо Байдены энэхүү тайлбарыг бүрэн үгүйсгэж байгаа юм. Дональд Трамп нь бензиний үнэ тэнгэрт хадсаны гол буруутан нь Байден гэж шууд хэлсэн. Украйны дайн эхлэхээс бүр өмнө, Байдены явуулж байгаа “ногоон” бодлогын улмаас өссөн гэж Трампмэдэгдсэн байна. 

Инфляцын талаарх иргэдийн санал бодлыг тодруулсан асуулгаар таван америк хүн тутмын нэг нь шатдаг хийн үнэ огцом өссөнөөс болж санхүүгийн хүндрэлд орсон гэж хариулжээ. Мөн америкчуудын дийлэнх нь юмны үнийн өсөлтөд Путинээс гадна Байден буруутай, газрын тос олборлогч компаниуд буруутай, Ардчилсан намын явуулж байгаа бодлого буруутай гэж хариулжээ.

Үүнээс ч өмнө АНУ тэргүүтэй Өрнөдийн улс орнуудад тулгарсан бэрхшээл хүндрэлийг Путины явуулга гэж тайлбарлаж, бүх бурууг ОХУ-ын Ерөнхийлөгчид тохох нь нэлээд түгээмэл үзэгдэл байсан. Харин Оросыг Украйныд тусгай ажиллагаа эхлүүлснээс хойш Путинийг бензин, хүнсний бүтээгдэхүүний өсөлтөөс эхлээд цахилгааны төлбөр өндөр гарах, инфляц гээд юм болгонд буруутгах нь хэвийн үзэгдэл болсон. Өрнөдийн улс орнуудад ямар нэг салбарт нь бэрхшээл тулгарвал төд удалгүй буруутнаар нь Путин тодорно гэдэгт мөрийцсөн ч болохоор болжээ. Өрнөдийн сонгогчдын дийлэнх нь анхандаа “Путинбүхэнд буруутай” гэсэн зарчимд итгэж байсан бол инфляц өсөхийн хэрээр эргэлзэгчдийн эгнээ хурдтай тэлж байгаа аж.