Шар өвс шатааснаас үүдэж зүүн салаанд хэд хэдэн айлын хашаа байшинг хамран 5 орчим га талбай шатсан байна

Сонгинохайрхан дүүргийн Зүүн салаа орчимд зуслангийн байшин 16:00 цагийн үед  шатаж эхэлжээ. Тодруулбал, тус дүүргийн Онцгой байдлын газарт  16:02 цагийн үед  "СХД-н 34-р хороо "Номун" амралтын газарт шар өвс шатаж байна" гэх  дуудлага ирсэн байна. Улмаар гал түймэр унтраах, аврах 11 дүгээр ангиас хоёр  автомашинтай 11 албан хаагч гарч таван га газрын хөрсний шар өвс шатаж байсныг 16:30 цагт бүрэн унтраалаа.

Салхитай байгаа учраас гал богино хугацаанд тархаж, өргөн цар хүрээг хамаржээ. Энэ жилийн тухайд нийслэл Улаанбаатар хотын нутаг дэвсгэрт хуурайшилт ихтэй, хуурайшилтын зэрэг өндөр түвшинд байна. Тиймээс хуурайшилтын улирал үргэлжилж байгаа учраас  иргэд бүсэд зорчихдоо асаасан гал, чүдэнз, татсан тамхины гал, цог, нурмыг бүрэн унтрааж, галын аюулгүй байдлаа хангах, айл өрхүүд халуун үнс, нурмыг тусгайлан бэлдсэн таглаа бүхий нүх, саванд хийх хэрэгтэй гэдгийг НОБГ-аас анхааруулж байна.