Нэрт жүжигчин Уилл Смитийг “Оскар”-ын ёслолд оролцохыг 10 жилээр хориглолоо

Америкийн кино академи “Оскар”-ын шагнал гардуулах ёслолын үеэр зүй бус үйлдэл гаргасан жүжигчин Уилл Смитийг дээрх ёслолд оролцохыг 10 жилээр хоригложээ. Уилл Смит энэ жилийн ёслолын үеэр элэглэгч Крис Рокийг тайзан дээр алгадсан юм.

“Америкийн кино акадеийн Удирдах зөвлөл өнөөдөр хуралдаж, Уилл Смитэд ногдуулах хариуцлагын асуудлыг авч хэлэлцлээ. Хэлэлцээд Академиас зохион байгуулсан аливаа ёслол хүндэтгэлийн арга хэмжээнд биечлэн болон цахимаар оролцохыг хориглох шийд гаргалаа” гэж Удирдах зөвлөлөөс гаргасан албан ёсны мэдэгдэлд өгүүлсэн байна.

Уилл Смит Крис Рокийг алгадсаныхаа дараа уучлалт гуйж, улмаар Америкийн кино академиас гарсан. Гэсэн ч шийтгэлээс мултьарч чадалгүй болчимгүй үйлдлийнхээ төлөөсийг төлсөөр байна. Саяхан “Нетфликс” компани түүнтэй хамтарч ажиллахаа больсоноо зарлаж цаашид хамтран ажиллахгүй гэж мэдэгдсэн юм.