Хөгжлийн банкны ажлын хэсгийг ахалж байгаа Б.Баттөмөр гишүүн өөрөө шалгуулах ёстой гэлээ

УИХ-ын 2022 оны ээлжит бус чуулганы хуралдаанаар Хөгжлийн банктай холбоотой асуудалд хяналт тавих ажлыг хэсгийг УИХ ын гишүүн Б.Баттөмөрөөр ахлуулан байгуулсан. Тус ажлын хэсэг Хөгжлийн банкнаас санхүүжүүлсэн төсөл, хөтөлбөрийн хэрэгжилтэд хяналт тавьж, аудитын тайлан дүгнэлттэй танилцаж Засгийн газарт чиглэл өгөн, УИХ-д танилцуулах үүрэг хүлээсэн.

Хөгжлийн банканд үүссэн асуудлыг шалгах ажлын хэсгийнхэн зээлээ зориултын бусаар ашигласан мөн өнөөг хүртэл нэг ч төгрөгийн эргэн төлөлт хийгээгүй байгаа 20 аж ахуйн нэгжийг олон нийтэд зарласан. Дэндүү эрх мэдэлтэй дээрх 20 компанийн тэргүүн эгнээнд Бэрэн групп толгой цохиж 44 гаруй тэрбум төгрөгийн өрийн үлдэгдэл байгаа юм. Хөгжлийн Банкны зээл мэдээлэлд ойр эрх мэдэл бүхий цөөхөн улс төрчдийн эргэн тойрноор хүрээлэгдсэн тоглоом гэдгийг өнгөрсөн хоёр сард бид хангалттай харсан.

Тэгвэл эрх мэдэлтнүүдийн тоглоом өнөөдрийг хүртэл дуусаагүй хөгжлийн банкыг шалгах ажлыг ахалж байгаа УИХ ын гишүүн Б.Баттөмөр өөрөө чанаргүй зээлдэгч Бэрэн группэд хувьцаа эзэмшдэг гэлээ. УИХ ын гишүүн Х.Ганхуяг өнгөрсөн долоо хоногт зохион байгуулагдсан нээлттэй сонсголын үеэр Бэрэн группд хувьцаа эзэмшдэг Б.Баттөмөр гишүүн өөрөө шалгуулах ёстойг ч онцлон мэдэгдэж байсан юм.

Үүнээс харахад УИХ аас сүржин байгуулсан ажлын хэсэг Хөгжлийн банкны асуудлыг ямар нэг эрх ашгийн зөрчилгүйгээр шалгаж чадаж байна уу гэдэг эргэлзээ олон нийтийн дунд төрж эхлээд байна.