АНУ-д Автобензиний үнэ литр тутамд 3,338.5 төгрөгт хүрч 24.5 хувиар өсжээ

Дэлхийн зах зээл дээрх газрын тосны үнийн өсөлттэй холбоотойгоор АНУ-д шатахууны үнэ их хэмжээгээр өссөөд байгаа бөгөөд Байдены засаг захиргаа шатахууны үнийн өсөлтийг бууруулах зорилгоор газрын тосны стратегийн нөөц(SPR)-өөс ойрын 6 сарын хугацаанд өдөрт 1 сая баррель буюу нийт 180 сая баррель гаруй газрын тос гаргахаар хэлэлцэж байна гэж Америкийн эх сурвалж Лхагва гарагт мэдэгдсэн.

АНУ сүүлийн 6 сарын хугацаанд 3 дахь удаагаа стратегийн нөөцөөсөө газрын тос гаргаж байгаа бөгөөд энэ удаагийн хэмжээ сүүлийн 50 жилийн түүхэн дэх хамгийн дээд хэмжээ болж байна.
Гэвч дэлхийн газрын тосны хэрэглээ цар тахалын өмнөх үеийн түвшинд хүрсэн, газрын тосны нийлүүлэлт хязгаарлагдмал байгаа энэ үед стратегийн нөөцөөс газрын тос гаргаж байгаа нь шатахууны үнийг бууруулахад дорвитой нөлөө үзүүлж чадахгүй байна.
АНУ-д 2022 оны 01-р сарын 03-ны байдлаар автобензин нэг галлон нь 3.472 ам.доллар буюу литр нь 2,613.7 төгрөг байсан бол 03 дугаар сарын 28-ны өдрийн байдлаар 4.322 ам.доллар буюу 3,338.5 төгрөгт хүрч 24.5 хувиар огцом өссөн.
АНУ-ын Эрчим хүчний яамны мэдээлснээр одоогийн байдлаар АНУ-ын газрын тосны стратегийн нөөцөд 568.3 сая баррель газрын тос байгаа нь 2002 оны 5 дугаар сараас хойших хамгийн бага хэмжээ юм.