Бэрэнгийн балгаар хохирсон иргэдэд биш эрх мэдэлтэнд шүүх үйлчилж байна уу?

Сүхбаатар дүүргийн 11 р хороонд байрлалтай Хангай хотхоныг бүрэн цутгамал, орчин үеийн хамгийн чанатай бөгөөд хямд хэмээн сүржин реклам цацсаар Бэрэн групп цутгалт нь дөнгөж эхэлсэн байрандаа захиалга авч байсан.  Гэвч банкны барьцаанд байгаа орон сууцаа иргэдэд рекламдан зарсан Бэрэнгийн балгаар Хангай хотхоны хоёр блок байранд оршин суугаа 100 гаруй өрх гэрчилгээгээ авч чадахгүй нөхцөл байдалд ороод байгаа юм.

Авч байгаа цалин нь амжиргаандаа хүрэхээ байсан Монголын нийгэмд орон сууцанд орно гэдэг тийм ч амар даваа биш. Хүсэхийн хэрээр хясаж байгаа энэ цагт авсан байраа алдахад хүрсэн Хангайчууд шударга шүүхэд л итгэж суугаа. Гэвч Бэрэнгийн балгаар хохирч байгаа Хангай хотхоны иргэдийн итгэл алдарч эхэллээ. Учир нь өнгөрсөн 2-р сарын 22 нд цагдан хоригдсон Бэрэн группийн захирал Б.Мөнхтөрд авсан таслан сэргийлэх арга хэмжээг  3-р сарын 14-ний өдөр Сүхбаатар дүүргийн эрүүгийн хэргийн анхан шатны шүүх хүчингүй болгосон. Уг нь бол хуулийн байгууллага гэмт этгээдийг дахин гэмт хэрэг үйлдэх, оргон зайлах, гэмт үйлдлээ нуун дарагдуулах оролдлого хийхээс сэргийлэн ажиллах ёстой. Гэтэл Бэрэнгийн захиралыг шүүхээс суллаж цагдан хорих үндэслэлгүй гэж үзсэн нь  банкны барьцаанд амьдарч байгаа өрхүүдийг гудамжинд гар гэж байгаатай ялгаагүй шийдвэр юм.

Бэрэн групп хөгжлийн банкинд учруулсан хохирлоо нэн даруй барагдуулж байж айл өрхүүдэд орон сууцны гэрчилгээг нь гарган өгөх боломжтой. Гэтэл шүүхээс гаргаж байгаа энэ мэт шийдвэр шударга шүүхэд итгэх иргэдийн итгэлийг улам бүр хөсөрдүүлсээр байна.