116 ДУГААР СУРГУУЛИЙН СУРАГЧДЫН ГОМДЛЫГ ҮНДЭСЛЭЛТЭЙ ЭСЭХИЙГ ШАЛГАХААР АЖЛЫН ХЭСЭГ БАЙГУУЛАГДАВ

Сургуулийн удирдлагууд сурагчидаа сонсдоггүй, тэдэнтэй дорд харьцдаг, сурах орчин нөхцөлийг бүрдүүлдэггүй мөн дарамталдаг, тавсан шаардлагыг хүлээн авдаггүй гэх үндэслэлээр 116 дугаар тусгай дунд сургуулийн сурагчид хичээл хаялтыг хоёр ч удаа зарласан. Бүр хэвлэлийн бага хурал хийн сургууль дээрээ үүсээд байгаа асуудлын талаар нийтэд мэдээлсэн. Харъяа яамны сайд суудлаасаа огцорсон энэ үеэр тэд аргаа баран яамны Төрийн нарийн бичгийн даргатай уулзжээ. Тэдэнд тулгараад байгаа асуудлыг эерэгээр хүлээн авсанд нь тэд баярлаж байгаагаа мэдээллийн хэрэгслүүдээр хэлсэн. Боловсрол, соёл, шинжлэх ухаан, спортын сайдын үүргийг түр хавсран гүйцэтгэгч, Засгийн газрын Хэрэг эрхлэх газрын дарга Ж.Мөнхбат өнөөдөр тус яамны Төрийн нарийн бичгийн дарга, удирдах албан тушаалтнууд, Нийслэлийн Боловсролын газрын дарга болон сургуулийн захирал, багш нарын төлөөлөлтэй уулзлаа.

Тэрбээр сурагчдын гомдол үндэслэлтэй эсэхийг тогтоох Ажлын хэсэг байгуулж, ажилд нь оруулан, дүгнэлтээ Сайдын зөвлөлийн хурлаар хэлэлцүүлэхийг яамны Төрийн нарийн бичгийн дарга Б.Баярсайханд даалгажээ. Гомдол үндэстэй бол захирал, холбогдох багш нарт хариуцлага тооцно гээд Ажлын хэсэг аль нэг талыг барьж ажиллахгүй байхыг онцгойлон санууллаа.

Энэ шалгалт хэн нэг хүн, багшийг захиалгаар, зохион байгуулалттайгаар ажилгүй болгож хэлмэгдүүлэх гэж байгаа хэрэг бус гэдгийг ч сайдын үүргийг түр хавсран гүйцэтгэгч Ж.Мөнхбат тодотгов. Цаашид боловсролын салбарт иймэрхүү алдаа дутагдал гарах ёсгүй, асуудал байвал дотооддоо ярьж, харилцан ойлголцож, ажлаа хэвийн явуулж байх хэрэгтэй гэдгийг сургуулийн захирал, багш нарт анхаарууллаа.