Тусламжийн хувцас авах гэсэн иргэд үүрийн 06:00 цагаас эхлэн 200 метр хүртэл урт дараалал үүсгэжээ

Өнөөдөр өглөө 09 цагийн орчимд Монгол бөөгийн-Гэр музей, Буянт дэнж төрийн бус байгууллага хамтран  япон бэлэн хувцас үнэгүй тарааж эхэлжээ. Сайн үйлсийн аяны зорилго нь өрх толгойлсон ээж, аав болон амьдралын боломжгүй иргэдэд хувцас хандивлах байсан ч хоёр хоногийн өмнө цахим сүлжээнд байршуулсан зарын дагуу иргэд үүрийн 06 цагаас эхлэн 200 метр орчим үргэлжлэх урт дараалал үүсгэсэн байна.

Дэнжийн 1000 авто баазын ойролцоох өрхийн эмнэлгийн ар талын авто угаалга дотроос нийт 20 тонн япон бэлэн хувцас үнэгүй тараана гэх зарыг хоёр хоногийн өмнөөс цахим сүлжээнд байршуулжээ.Зарын дагуу олон хүний хөл дарж байгаагаас автозамын түгжрэл нэмэгдэж, зарим иргэд өрхийн эмнэлэг рүүгээ очиж чадахгүй байна гэсэн гомдол мэдүүлэх болсон талаар эх сурвалжууд мэдээлж байна. Мөн хувцас авахаар оочерлож байгаа иргэд хоорондоо маргалдаж, үл ойлголцсоны улмаас муудалцаж зодолдох тохиолдол ч гарчээ. Иргэдийн энэ дүр зураг цахим сүлжээнд шүүмжлэлд өртөж төрийн толгойд байгаа эрх мэдэлтнүүд ард түмнээ ийм хэмжээнд тултал нь туйлдуулж байгааг хэлж байна. 

Хувцас үнэ төлбөргүй тараах ажил зөвхөн өнөөдөр үргэлжлээд дуусах сургаар тусламжийн бараа авах иргэдийн дараалал 200 метр хүртэл үргэлжилж байна гэж ойр хавьд нь оршин сууж байгаа иргэд мэдээлж байгаа юм.