ХӨГЖЛИЙН БАНК: “Bloomberg TV Mongolia”телевизтэй 814.2 сая төгрөгийн зар сурталчилгаа байршуулах гэрээ байгуулжээ

Хөгжлийн банкийг эрх мэдэл, албан тушаалтай хүмүүс нийлээд тоночихсон нь олон нийтэд ил болоод буй чанаргүй зээлдэгч нарын жагсаалтаас тодорхой харагдана. Үүний дээр Хөгжлийн банк дотооддоо ч олон асуудалтай байсан нь тус банкинд хийсэн шалгалтын дүнгүүдээс харагдаж байгаа юм. Орон тоог үндэслэлгүй нэмэгдүүлсэн, цалин урамшуулалд их хэмжээний мөнгө зарцуулсан, шууд худалдан авалт хийх замаар өндөр зардал гаргасан гэх асуудлууд бий. Үүний нэг олон нийтийн мэдээллийн хэрэгсэлд зарцуулсан өндөр дүнтэй гэрээний асуудал юм. 

Тэгвэл тус банк 2014 онд олон нийтэд мэдээлэл хүргэх зардалд 1.2 тэрбум төгрөг зарцуулсан бөгөөд үүний 814.2 сая төгрөгийг “Bloomberg TV Mongolia”телевизэд зар сурталчилгаа байршуулах гэрээ байгуулахад зарцуулжээ. Өөрөөр хэлбэл тухайн жилд зарцуулсан олон нийтэд мэдээлэл хүргэх зардлын 70 хувийг нэг телевизэд зарцуулсан гэсэн үг юм. “Bloomberg TV Mongolia” телевизийг Худалдаа, хөгжлийн банк, Bloomberg телевизтэй хамтран үүсгэн байгуулж байсан юм. 

Эндээс Хөгжлийн банк ХХБ-ны хамаарал бүхий этгээдүүдийг дэмжиж ирсэн нь тодорхой харагдана. 

1. ХХБ-ны ТУЗ-ын дарга Д.Эрдэнэбилэгийн хамаарал бүхий компаниуд Хөгжлийн банкнаас 507 тэрбумыг аваад мурьчихсан найдваргүй зээлдэгч 

2. Хөгжлийн банкнаас арилжааны банкуудад байршуулсан хадгаламжийн дийлэнхи хувь нь ХХБ, Улаанбаатар хотын банк, Голомт банкинд байршсан байгаа нь шударга бус өрсөлдөөнийг дэмжсэн байдал харагдаж байгаа бөгөөд цаашид хуулийн байгууллагаар шалгуулах шаардлагатай байна. /ҮАГ-ын шалгалтын тайлан 2014 он/
3. Худалдаа, хөгжлийн банктай хамтран байгуулсан “Bloomberg TV Mongolia”-тай 814.2 сая төгрөгийн зар сурталчилгаа байршуулах гэрээ хийсэн. 

Дашрамд дурдахад “Bloomberg TV Mongolia” телевизийн гүйцэтгэх захирлаар Э.Долгион 2013 оноос ажиллаж эхэлсэн бөгөөд одоогоор Монгол Улсын Ерөнхий сайдын зөвлөхөөр ажиллаж байгаа юм.