Хэнтий аймаг хог хаягдал дахин боловсруулах үйлдвэртэй хамтран ажиллахаар боллоо

Хэнтий аймгийн Засаг дарга Ц.Чогсомжав болон ХБТХОХ-ийн дарга Э.Мөнх-Эрдэнэ нар хог хаягдлыг дахин боловсруулах үйлдвэр болох “Пластик центр” компаний үйл ажиллагаатай танилцаж, туршлага судаллаа.

Тус компани нь 2016 онд байгуулагдсан бөгөөд хаягдал гялгар уут дахин боловсруулж, бохирын кольцо, 100 хувийн битүүмжлэлтэй нүхэн жорлонгийн доторлогоо, трейшины таг, тэмдэгтийн шон гэх мэт 20 гаруй төрлийн бүтээгдэхүүн үйлдвэрлэдэг улсдаа анхдагч байгууллага юм. Тус компаний бүтээгдэхүүнүүд нь байнгын эрэлттэй байдаг ч түүхий эдийн олдоц ховор байдаг аж.

Хэнтий аймгийн хувьд орон нутагтаа хогны үйлдвэр байгуулж, бүтээгдэхүүн үйлдвэрлэхэд хог хаягдлын нөөц хангалттай биш байгаа нь судалгаагаар харагддаг. Тиймээс эхний ээлжинд хогоо ангилан ялгаж, преслэн тус үйлдвэрт нийлүүлэх нь хамгийн оновчтой гарц болоод байна. Зөвхөн гялгар уутыг нийлүүлснээр нийт хог хаягдал 30 хүртэл хувиар буурах боломжтой юм байна. Цаашилбал тус үйлдвэр нь гялгар уутнаас гадна ус ундааны сав, хуванцар сав, цаасан хайрцаг гэх мэт хог хягдлыг орон нутгаас худалдан авах боломжтой юм байна.

Тиймээс орон нутгийн зүгээс “Пластик центр” компани, Хог хаягдлын менежментийн зөвлөх үйлчилгээ үзүүлдэг “Өнгө нэм” компанитай хамтран ажиллах гэрээ байгуулж, иргэдийг хогоо ангилан ялгах чиглэлээр сургалт, сурталчилгааны ажлыг зохион байгуулах, ангилсан хогийг пресслэж, зах зээлд нийлүүлэх бүхий л шатны үйл ажиллагаанд хамтран ажиллахаар болжээ.  

Энэхүү ажил амжилттай хэрэгжиснээр ажлын байр нэмэгдэх, аймгийн хог хаягдал 30-40 хувь буурах, хог хаягдал нь бүтээгдэхүүн болж ашиг орлого олох, иргэд эрүүл цэвэр орчинд амьдрах гэх мэт олон талын ач холбогдолтой юм.