ХӨГЖЛИЙН БАНК: 315 тэрбумын өртэй “ТОСК” зээлийг зориулалт бусаар ашигласан

Засгийн газрын тогтоолын дагуу олгосон хамгийн том үнийн дүнтэй зээлийн нэг Төрийн орон сууцны корпорацийн зээл. “Буянт-Ухаа 1”, “Буянт-Ухаа 2”, “Шинэ яармаг орон сууцны хороолол”, “Барилгын хийц үйлдвэрлэх хөдөлгөөнт цогцолбор” зэрэг 4 төслийг хэрэгжүүлэхээр авсан зээлийн нийт үлдэгдлийн хэмжээ 315 тэрбум төгрөг. Хүн амыг хямд өртөгтэй, чанартай орон сууцаар хангах зорилгоор хэрэгжүүлсэн “Буянт-Ухаа 1,2 ”төсөл 100 хувь гүйцэтгэлтэй, үлдсэн хоёр төслийн хувьд 50 хувийн гүйцэтгэлтэй явж байна. Гэсэн ч ТОСК өрөө төлж барагдуулаагүй өнөөдрийг хүрчээ. Төслийн үйл ажиллагаанд хийсэн шалгалтаар ТОСК-д олгосон зарим зээлийг зориулалт бусаар ашигласан, дамжуулан хөрөнгө оруулалт нэрийн дор гуравдагч компаниудад зээл өгсөн зөрчил илэрчээ.  

Дашрамд дурдахад ТОСК-ийн захирлаар ажиллаж байсан А.Гантулга нь албан тушаал эрх мэдлээ урвуулан ашиглаж улсад онц их хэмжээний хохирол учруулсан үндэслэлээр хууль хяналтын байгууллагаар олон жил шалгагдсаны эцэст 2021 оны 12 дугаар сард Нийслэлийн Чингэлтэй дүүргийн Эрүүгийн хэргийн анхан шатны шүүхээс 5 жилийн хорих ял авсан юм.

ТОСК-ийн зээлийг хууль зөрчиж Засгийн газрын тогтоолоор гаргасан байдаг. Тодруулбал 2011 онд батлагдсан Хөгжлийн банкны тухай хуулийн 8.1-т “Хөгжлийн банк нь Улсын Их Хурлын баталсан Монгол Улсын хөгжлийн томоохон төсөл, хөтөлбөрүүдийг санхүүжүүлэхэд зориулан зээл олгох бөгөөд санхүүжүүлэх төсөл, хөтөлбөрийн жагсаалтыг Улсын Их Хурал жил бүрийн хаврын чуулганаар батална” гэсэн ч хуулийн уг заалтыг зөрчин ЗГ-ын тогтоолоор олгосон томоохон дүнтэй зээлүүд олон бий. Энэ тухай Засгийн газар болон Үндэсний аудитын газрын шалгалтын ажлын хэсгийн материалд дурдсан байдаг юм.