Залилан мэхлэх гэмт хэргээр шалгагдаж буй “Ганхүдэр Орд” ХХК 26 сая төгрөг төлжээ

Монгол Улсын Хөгжлийн Банкнаас олгосон чанаргүй зээлтэй холбоотой асуудалд хууль хяналтын байгууллагаас шалгалтын ажиллагаа хийж байгаа билээ. Тухайлбал, прокурорын байгууллагаас  Засгийн газрын Хэрэг эрхлэх газар болон Хөгжлийн банкнаас 2019, 2020 онд ирүүлсэн хүсэлтийн дагуу  “Хөтөл” ХХК, “Бэрэн групп”, “Монгол драй милк” ХХК, “Бишрэлт групп” ХХК, “Ганхүдэр Орд” ХХК-тай холбоотой хүсэлтүүдийг эрүүгийн журмаар шалгуулахаар холбогдох мөрдөх байгууллагад шилжүүлсэн. 

“Ганхүдэр Орд” ХХК-ийн тухайд  5.9 тэрбум төгрөгийн зээлийг Хөгжлийн банкны гүйцэтгэх захирлын тушаалаар 2017 онд авсан. Хорголжин төмрийн үйлдвэр барих төсөлд авсан уг зээл нийт 5.6 тэрбум төгрөгийн зөрчилтэй байгаа бөгөөд үндсэн зээлийн төлөлт 878 хоног, хүүгийн төлөлт 1151 хоног тус тус хугацааны хэтрэлт үүссэн байна. Өнгөрсөн дөрвөн жилийн хугацаанд 1,06 тэрбум төгрөг төлөгдөөд байсан бол энэ оны нэгдүгээр сарын 20-ны өдрөөс хойш 26.5 сая төгрөгийн зээл төлөгджээ.

Тус компанийн үйл ажиллагаа хэвийн боловч төлбөр төлөгдөхгүй байгаа тул СБД-ийн Цагдаагийн нэгдүгээр хэлтэст залилан мэхлэх гэмт хэргийн шинжтэй үйлдлийг шалгуулахаар хандсан, мөрдөн шалгах ажил үргэлжилж буй.