ҮР ДҮН: "Монгол драй милк" ХХК 47 тэрбум төгрөгийн зээлнийхээ 1.2 тэрбумыг төлжээ

Хөгжлийн банкнаас зээл авсан 25 ААН-ийг  чанаргүй зээлийн ангилалд оруулсан. Тус банкнаас чанаргүй зээлдэгчдийг энэ оны нэгдүгээр сарын 20-ны өдөр зарласнаас хойш зээл төлөлт идэвхжиж өнөөдрийн байдлаар 79 тэрбум төгрөгийн эргэн төлөлт хийгджээ. 

Шүүхэд нэхэмжлэл гаргасан чанаргүй зээлдэгчийн нэг  нь “Алтай констракшн” ХХК-ийн захирал Х.Бат-Эрдэнийн хамаарал бүхийн "Монгол драй милк" ХХК юм. Тус компани хөдөө орон нутгуудад 60 ширхэг хуурай сүүний үйлдвэр байгуулж дотоодын зах зээлийг хуурай сүүгээр бүрэн хангаж, тэр ч бүү хэл гадаад руу экспортлох төслөөрөө Хөгжлийн банкнаас 15 сая ам.доллар буюу 47 тэрбум төгрөгийн зээл авч байв.  Мөн зээлийн барьцаа болох хамаарал бүхий аж ахуйн нэгжүүдийн хөрөнгө нь 47 тэрбум төгрөгийнхөө 10 хувьд ч хүрэхгүй үнийн дүнтэй байснаас гадна сүүний үйлдвэр байгуулаагүй буюу зээлийг зориулалт бусаар ашигласан учир 2019 оны есдүгээр сарын 23-нд шүүхэд шилжүүлсэн байдаг. Гэвч 2019 оноос хойш  шүүх хурал нь нийтдээ 11 удаа хойшилж байв. 

 Тэгвэл "Монгол драй милк" ХХК 47 тэрбум төгрөгийн зээлнийхээ 1.2 тэрбум төгрөгийг төлсөн байна.

Түүнчлэн "Алтай констракшн" компанийн захирал  Х.Бат-Эрдэнийн шүүх хурал  энэ оны хоёрдугаар сарын 23-ны өдөр болж, шүүх хурлаар "Алтай констракшн" компанийн захирал  Х.Бат-Эрдэнийг "гэмт хэрэг үйлдэж болзошгүй талаар баримт байгаа" гэх үндэслэлээр тус өдрөөс эхлэн 30 хоног цагдан хорих шийдвэр гаргасан билээ.