ЗЭСТ-ӨНДӨР ХХК: 11 тэрбум төгрөгийн зээлээ зориулалт бусаар ашигласан

Хөгжлийн банкны анхаарал хандуулах зээлийн ангилалд багтаж буй Зэст-Өндөр ХХК өнөөдрийн байдлаар 11.6 тэрбум төгрөгийн зээлийн үлдэгдэлтэй байна. Тус компани Ширэн-Овоо төмрийн хүдрийн ордыг ил уурхайн аргаар ашиглах төсөл хэрэгжүүлэхээр 2018 онд 439.4 сая иенийн зээлийг ХБ-ны ТУЗ-өөс гарсан шийдвэрийн дагуу авсан байдаг. Ингэхдээ 17.6 тэрбумын биет бус хөрөнгийг барьцаалан зээл авсан байдаг.

Тэгвэл тус компани төслөө хэрэгжүүлэлгүй, зээлийг зориулалт бусаар ашигласан нь тогтоогдсон тул ХБ-наас 2020 оны 6 дугаар сарын 16-ны өдөр шүүхэд нэхэмжлэл гаргасан байна. Анхан шатны шүүхээс банкны талд шийдвэр гаргасан ч давж заалдах шатны шүүх өмнөх шийдвэрийг хүчингүй болгосон тул Улсын дээд шүүхээр маргааныг шийдвэрлүүлэхээр хүлээгдэж байгаа юм.

Дашрамд дурдахад, Зэст-Өндөр ХХК-ийг УИХ-ын гишүүн Х.Болорчулууны нөмрөг дорх уурхай гэж нэг хэсэг цоллож байсан удаатай. Тус компани нь Ширэн-Овоо төмрийн хүдрийн ордыг ил уурхайн аргаар ашиглах төслийг Дорнод аймгийн Халх гол суманд хэрэгжүүлэхээр төлөвлөөд байсан юм.