​ ХӨГЖЛИЙН БАНК: Хадгалагч 7-13 хувийн хүү санал болгосон ч 1 хувийн хүүгээр мөнгөн хадгаламж байршуулжээ

Хөгжлийн банк нь өөр дээр сул чөлөөтэй байгаа татан төвлөрүүлсэн эх үүсвэрээ арилжааны банкуудад мөнгөн хадгаламж хэлбэрээр байршуулдаг. Ингэхдээ хадгалагчаас санал болгож буй нөхцөлөөс доогуур буюу хамгийн бага хүүгээр хадгалуулдаг байсныг тус банканд шалгалт явуулсан ажлын хэсэг тогтоожээ.

Тухайлбал, Хаан банканд мөнгөн хадгаламж байршуулах 8 гэрээний дагуу 170 тэрбум төгрөг болон 564 сая иенийг байршуулахдаа жилийн 1 хувийн хүүтэйгээр хадгалуулжээ. Гэтэл Хаан банкны албан ёсны хуудаст байгууллагын хугацаатай мөнгөн хадгаламжийн хүү хугацаанаас хамааран хамгийн багадаа жилийн 7-13 хувийн хүүтэй байх нөхцөлийг санал болгосон байх юм. 

Мөн Голомт банканд 2 хувийн хүүтэйгээр хадгаламж байршуулсан ба тус банк төгрөгийн 9.08 хувь, валютын хувьд доллар 3.25 байхаар тусгажээ. Хас банканд 3 гэрээгээр 96 тэрбум төгрөгийг 1-11 хувийн хүүтэй хадгалахаар гэрээлсэн бөгөөд Хас банкны хугацаатай хадгаламжийн бодит хүү 8.6-13.3 хувьтай байна.
Дээрхээс харахад, Хөгжлийн банк арилжааны банкуудад мөнгөн хадгаламж байршуулахдаа хадгалагчийн нийтэд санал болгож буй нөхцөлөөс доогуур хамгийн бага хүүгээр гэрээ байгуулсан нь ойлгомжгүй бөгөөд Хөгжийн банкны тухай хуульд заасан “ашигтай ажиллах” зарчимд нийцэхгүй байна. Энэ нь Хөгжлийн банкны албан тушаалтнуудын ашиг сонирхолд нийцэж байсан гэж хардахаар байна.

Эх сурвалж: МУХБ-ны үйл ажиллагаанд хийсэн хяналт шалгалтын тайлан ЗГ-2019 он