Ясны үйлдвэрээс ирээдүйд олох орлогоосоо 9,9 тэрбум төгрөгийг барьцаалж зээл авчээ

“Кредос” компани Малын яс боловсруулан органик уураг, тос гарган авах үйлдвэрийг барих зорилгоор Хөгжлийн банкнаас 2017 онд 794 сая иен, 2020 онд нэмж 2 тэрбум төгрөг тус тус авсан талаар бид мэдээлсэн билээ.  Өнөөдрийн байдлаар нийт үлдэгдлийн хэмжээ 25 тэрбум төгрөг. Тэгвэл тус компани авсан зээлийнхээ ердөө 6 тэрбумыг л үйлдвэр барихад зарцуулж, үлдсэн 15 орчим тэрбум төгрөгийг үнэт эдлэлийн худалдааны бизнес болон үнэтэй машин худалдан авахад буюу зээлийг зориулалтын бусаар ашигласан гэдгийг Хөгжлийн банкнаас зарласан. 

Түүнчлэн тус компани зээл авахдаа ирээдүйд олох орлогоосоо 9,9 тэрбум төгрөг барьцаалсан нь анхаарал татаж байгаа юм. Өөрөөр хэлбэл, энэ нь барьцаа хөрөнгийнх нь 44 хувь гэсэн үг.  Угтаа барьцаа хөрөнгө гэдэг нь зээлдэгчийн зээлдүүлэгчид зээлээ төлөх баталгаа болгож буй хөрөнгийг хэлэх болохоос бус ирээдүйд олох орлого огтхон ч биш. Хэрэв зээлдэгчид тодорхой хугацааны туршид зээлийн эргэн төлөлтөө хийгээгүй бол зээлдүүлэгч нь барьцаа хөрөнгийг хураан авч, зээлийн гэрээний үүргийн хэрэгжилтийг хангуулдаг атал “Кредос” компанид барьцаа хөрөнгө хангалтгүй ирээдүйд олох орлогыг нь барьцаалж зээл олгосон нь үүгээр нотлогдож байгаа юм. 

 Харин ХБ-наас авсан зээлийнхээ ихэнхийг оруулсан үнэт эдлэлийн дэлгүүрийн бараа нь хамгийн багадаа 35 сая төгрөгөөр зарагддаг аж. 

Тус үйлдвэрийн захирал Н.Оюунбат “Өөрөөр нь төлүүлье” хэлэлцүүлэгт оролцох үеэрээ Ковид-19-өөс шалтгаалан экспорт хийж боломжгүй болсон нь зээл төлөлт хийж чадахгүйд хүргэж байгаа тухайгаа хэлж, жирийн бизнес эрхлэгчдээ харж үзэхийг хүсч байсан ч бодит байдалд алд, дэлэмийн зөрүүтэй байна.