​ Ц.Гарамжавын татвараас зайлсхийсэн 33 тэрбумаас 1.8 тэрбумыг нь НӨАТ-аас нь төрийн санд суутган авчээ

УИХ-ын гишүүн асан Ц.Гарамжавын “Монцемент Билдинг Материалс” ХХК цементийн үйлдвэрийн тоног төхөөрөмж импортлохдоо гаалийн татвараас зайлсхийж 23 тэрбум төгрөгийн өр үүсгэсэн бөгөөд энэ нь хүү алдангитайгаа нийлээд 33 тэрбумд хүрсэн байдаг юм. Татварын өрөө төлөхгүй зайлсхийж Гаалийн ерөнхий газартай шүүхдэлцэж явсаар ирсэн ч шүүхийн шийдвэр ГЕГ-ын талд гарч, Ц.Гарамжав өрөө төлөхөөс өөр аргагүйд хүрсэн. Гэсэн ч мэлзсээр өнөөдрийг хүрсэн тул тус компанийн НӨАТ-ын илүү төлөлтөөс суутгуулах саналыг Гаалийн ерөнхий газраас  Сангийн яаманд хүргүүлснээр 2022 оны 2 дугаар сарын 28-ны өдөр 1.8 тэрбумыг нь суутган авчээ.   

БАРИМТ: “Монцемент Билдинг Материалс” ХХК-иас Төрийн санд төвлөрсөн мөнгөн дүнгийн баримтыг хавсаргав. /2022.02.28/

БИЧЛЭГ: “Монцемент Билдинг Материалс” ХХК-ийн татварын өр болох 33 тэрбумыг төлөх талаархи сэтгүүлчийн асуултад УИХ-ын гишүүн асан Ц.Гарамжав хариулсан бичлэгийг үзүүлье. Тэрээр тухайн үед 33 тэрбум төгрөгтэй холбоотой ямар ч шүүхийн шийдвэр байхгүй гэж мэлзэж байсан юм. /Төрийн ордон 2020.12.03-ны өдөр/ Харин өнөөдөр шүүхийн шийдвэр биеллээ олж “Монцемент Билдинг Материалс” ХХК-ийн татварын өр болох 33 тэрбумаас 2022 оны 2 дугаар сарын 28-ны өдөр 1.8 тэрбум төгрөгийн төлөлт Төрийн санд хийгдээд байна.

Дашрамд дурдахад, Ц.Гарамжавын “Монполимет” ХХК Хөгжлийн банкны чанаргүй зээлдэгч нарын жагсаалтыг үргэлжлүүлж байгаа. 2014 онд 65 000 000 ам долларын зээл авсан бөгөөд өнөөдрийн байдлаар үлдэгдэл өрийн дүн 113 тэрбум төгрөгтэй тэнцэж байгаа бөгөөд ханшийн зөрүүний алдагдал хүлээж буй шалтгаанаар өрөө төлөхөөс зайлсхийж байгаа юм.