Дайнаар далимдуулж баян Оросуудын хөрөнгийг хурааж магадгүй

Салан тусгаарласан Донбассыг хамгаалах байлдааны тусгай ажиллагаа эхэлсний дараагаас Европ, Хойд Америк тэр чигээрээ Оросын гэсэн юм болгоноос татгалзах, тусгаарлах, хурааж авах аян эхлүүлээд байна.

Энэхүү кампанит ажлын хүрээнд Лондонд олон мянгаараа бүгээд байсан Оросын саятнууд, тэрбумтнууд хамгийн ихээр хохирч магадгүй болжээ. Юуны өмнө ОХУ-ын иргэдийг Английн банк дахь дансандаа 66,8 мянган доллароос илүү мөнгө хадгалахыг хоригложээ. Түүнчлэн 2 сая фунтээс илүү үл хөдлөх хөрөнгө худалдан авсан Оросын иргэд шууд алтан виза, байнга оршин суух эрх олгодог байсныг цуцалсан байна. Ингэснээр Лондон амьдардаг орос саятан, олигархууд тун хүнд байдалд ороод байгаа аж.

Мөн энэ дуулианаар далимдуулж Оросын тэрбумтан Роман Абрамовичийн мэдэлд байдаг хөлмбөмбөгийн “Челси” багийг хураан авах саналыг Британийн парламент гаргасан байна. Абрамовичийг Путин ба түүний тойрон хүрээлэлтэй холбоотой бизнес эрхэлдэг гэж үзсэн учраас ийнхүү клубыг нь хураан авах гэж байгаа юм байна. Ингээд зогсохгүй Абрамовичийн нэр дээр бүртгэлтэй байдаг 152 сая долларын үнэтэй байр болон данс дах бүх бэлэн мөнгийг нь хурааж авахыг санал болгожээ.