​Зеленский Украйныг НАТО-д элсүүлэхгүй, төвийн сахисан улс болгох талаар Москватай ярихад бэлэн гэжээ

Украйны Ерөнхийлөгч Владимир Зеленксий  25-нд шилжих шөнө ард түмэндээ хандан ээлжит мэдэгдэл хийхдээ Украйныг төвийг сахисан улс байлгах талаар Москватай ярихад бэлэн гэжээ.

 Тэрээр мэдэгдэл хийхдээ “Өнөөдөр бид Москваг Украйны төвийн сахиусан статусын талаар ярихад бэлэн гэж байгааг олж сонслоо. Би өнөөдөр Украйныг НАТО-д элсүүлэх эсэх талаар Европын 27 орны удирдагчаас асуулаа. Бүгд айгаад хариулахгүй байна. Харин бид айхгүй байна, бид юунаас ч айхгүй байна, улс гүрнээ хамгаалахаас айхгүй, Оросоос айхгүй, Орос улстай манай улсад өгөх аюулгүй байдлын баталгаанаас эхлээд төвийг сахисан статус хүртэл юм болгоны талаар ярихад бэлэн байна” гэжээ.

 Украйн нь Майдан хувьсгалын дараа шинэ Үндсэн хууль батлахдаа улсаа НАТО, Европын холбооны гишүүн болгох нь нэн тэргүүний зорилго гээд заасан байдаг. Тэгэхээр Зеленский үнэн ярьж байгаа бол Үндсэн хуулиа өөрчлөх хэрэгтэй болно.

ОХУ-ын Путин нь Украйн улсыг НАТО-д элссэн тохиолдолд АНУ нь цөмийн дайралтын системээ тэнд гарцаагүй байршуулж таарах тухай тогтмол анхааруулсаар ирсэн. Ингэсэн тохиолдолд Украйнаас харвасан Америкийн цөмийн пуужин Москва хүртэл ердөө 5 минут ниснэ гэдгийг Путин нэг бус удаа онцолж байсан билээ. Одоогийн Украйны эрх баригчдын гол ивээн тэтгэгч бөгөөд өмөг түшиг болсон Вашингтоны хувьд улс орон ямар цэргийн эвсэлд элсэхээ өөрсдөө шийдэх ёстой гэсэн байр суурьтай байгаа.