Украины цэргийн нисэх хүчин байрладаг баазуудыг устгажээ

Оросын тал өндөр нарийвчлалтай зэвсгээр ашиглан Украины цэрэг, дайны дэд бүтцэд цохилт өгсөөр байна. ОХУ-ын Батлан хамгаалах яам Украины агаарын довтолгооноос хамгаалах хүчийг жагсаалтаас гаргасан тухайгаа мэдээлжээ. Мөн Украйны цэргийн нисэх хүчин байрладаг гол баазуудын дэд бүтэц устгагдсан гэж мэдэгджээ. Түүнчлэн Украины хил хамгаалах албаны цэргүүд Оросын цэргийн ангиудад ямар ч эсэргүүцэл үзүүлэхгүй, шууд нэвтрүүлж байгаа тухай мэдээлсэн байна.

Украины талын мэдээлснээр Оросууд пуужингаар цохилт өгсний улмаас Киев мужийн Белоцерковын дүүрэг дэх Ольшаница тосгонд байсан сум, галт хэрэгслийн агуулах шатаж дэлбэрсэн байна. Түүнчлэн Новые Петровцы тосгонд байрлаж байсан Украины Үндэсний гвардийн ерөнхий штаб цохилтод өртөн шатжээ. Цаашлаад Чернигов мужийн Нежинск тосгонд байсан удирдлага-диспетчерийн төв цохилтод өртөн шатсан байна. Мөн Днепропетровск муж дах Краснопилля, Марганец тосгодын ойролцоо байрладаг сум, галт зэвсгийн агуулах шатаж дэлбэрчээ. Виница мужийн Тульчин, Бохан тосгодод байрлаж байсан цэргийн ангиудын агуулах мөн л цохилтод өртжээ.