Боломжтой мөртлөө зээлээ төлдөггүй зальтай компани М.Билэгтийнх

Хөгжлийн банкны чанаргүй зээлдэгчдийн жагсаалтыг үргэлжлүүлж буй Монлаа ХХК 2014 онд Төмрийн хүдрийг нойтон аргаар боловсруулах үйлдвэр барих зориулалтаар 5.6 тэрбум төгрөгийн зээл авсан байдаг. Үйлдвэр нь ашиглалтанд орж, жилд дунджаар 50 орчим тэрбум төгрөгийн экспортын борлуулалт хийдэг бөгөөд 2021 онд 63 тэрбум төгрөгийн борлуулалт хийж өндөр ашигтай ажиллажээ. Жилийн орлого нь 50 тэрбумаас илүү компани өрөө төлөлгүй найман жил луу унжиж зээлийн нийт үлдэгдлээ 7.5 тэрбумд хүргээд байна.

Монлаа компани УИХ-ын гишүүн асан М.Билэгттэй холбогддог. Тодруулбал, тус компанийн хувьцааг М.Ганбагана, Н.Болдхүү, Х.Энхсайхан нар эзэмшдэг бөгөөд М.Ганбагана нь М.Билэгтийн хүү юм. 

Монлаа компанитай холбоотой хэрэг ШШГЕГ-т шилжсэн боловч өнөөдрийг хүртэл тус компанийн нэг ч дансыг битүүмжлээгүйн дээр компанийн гаалийн бүрдүүлэлтэд хязгаарлалт тавих Нийслэлийн ШШГГ-ын шийдвэрт саад учруулжээ. Тодруулбал, ШШГЕГ-ын дарга Б.Дашдаваа шийдвэр гүйцэтгэх ажиллагааг зогсоох, Монлаа ХХК-ийн гаалийн бүрдүүлэлтийн ажиллагааны хязгаарлалтыг сэргээх шийдвэр гаргасан байна. Эндээс Монлаа ХХК-иас ШШГЕГ-ийн удирдлагуудад нөлөөлсөн гэх хардлага төрж байна.