“Кью Эс Си” ХХК-ийн дансыг битүүмжлэх шийдвэрийг ХУД-ийн шүүгч Б.Мөнхбаяр хүчингүй болгожээ

Хөгжлийн банкны өндөр дүнтэй бөгөөд чанаргүй зээлдэгч “Кью Эс Си” компанийн арилжааны банкууд дахь дансыг битүүмжлэх шийдвэрийг ХУД-ийн Иргэний хэргийн анхан шатны шүүхийн шүүгч Б.Мөнхбаяр 2021 оны 5 дугаар сарын 20-ны өдрийн захирамжаараа хүчингүй болгожээ.

Прокуророос Кью Эс Си компанитай холбоотой анхан шатны шүүхэд нэхэмжлэл гаргаж, гэрээнд заасан эд хөрөнгүүдийг битүүмжлэх  арга хэмжээ авах хүсэлтийг ХУД-ийн Иргэний хэргийн анхан шатны шүүхэд гаргаж, шүүгчийн захирамжаар хүсэлтийг хангах шийдвэр гарчээ. Энэ дагуу Нийслэлийн ШШГГ-аас бүх арилжааны банкууд дахь Кью Эс Си компанийн дансыг битүүмжлэх арга хэмжээг 2021 оны 3 дугаар сарын 9-ний өдөр авсан байдаг. Гэтэл шүүгч нь өөрөө гаргасан захирамжаа хүчингүй болгосон нь шүүгч эрх мэдэл, албан тушаалаа урвуулан ашигласан, гэмт хэргийн шинжтэй гэж үзэж Хөгжлийн банкнаас АТГ-т гомдол гаргаж байжээ. 

Эргэн сануулахад, ХУД-ийн Иргэний хэргийн анхан шатны шүүхийн шүүгч Б.Мөнхбаяр нь өмгөөлөгч асан Б.Баасанцогтоос авлига авсан шүүгчдийн нэг юм. Тэрээр 2019 оны 8 дугаар сарын 30-ны өдөр өөрийн дансаар Б.Баасанцогтоос 5 сая төгрөгийн хахууль авсан нь баримтаар нотлогддог юм. 

Дашрамд дурдахад, “Кью Эс Си” компани нь “Уул уурхай, металлургийн цогцолбор байгуулах” төслийн хүрээнд Төмөртэйн ордоос Баянголын төмөр зам хүртэл 33.4 км төмөр зам барихаар анх зээл авсан бөгөөд төслийн хэрэгжилт 100 хувь, зээл төлөлт гацаад 8 жил болжээ. Хуулийн байгууллагаас тус компанийг авсан зээлээ зориулалтын дагуу ашиглаагүй, мөнгө угаалт хийсэн байх магадлалтай гэж үзэж байгаа. Хөгжлийн банкнаас зээлийг барьцаа хөрөнгөөр төлүүлэхээр тооцоолж үзэхэд бодит барьцаа хөрөнгө болох 12.7 тэрбум төгрөгийн үнэ бүхий машин механизмийн үнэ цэнэ буурсан гэж дүгнэжээ. Үлдсэн барьцаа хөрөнгө буюу 142 тэрбум нь ирээдүйд бий болох хөрөнгө байгаа юм. 

Эх сурвалж: Монгол Банкнаас Хөгжлийн Банканд хийсэн шалгалтын дүн 2021 он