Хөгжлийн банкны чанаргүй зээлийн асуудал яригдснаас хойш 21 байгууллага 48.9 тэрбумын төлөлт хийжээ

УИХ-ын гишүүн Б.Баттөмөр: Манай улс 2023 оны дөрөвдүгээр сард БНХАУ-ын Хөгжлийн Банкны 63 тэрбум төгрөг, мөн тухайн оны аравдугаар сард бондын 1.6 их наяд ам.долларын мөнгө төлнө. Мөн 2023 оны арванхоёрдугаар сард Японы Хөгжлийн Банкны Самурай бондын эргэн төлөлтийг хийнэ. ЗГ-ын нуруун дээр их хэмжээний ачаалал ирэх төлөвтэй байна. Өнөөдрийн байдлаар Хөгжлийн Банкны эрсдлийн сан 585 тэрбум төгрөг байсныг 1.3 их наяд төгрөг болгож нэмэгдүүлсэн. 777 тэрбум төгрөгөөр нэмэгдүүлсэн. Нийт зээл 2012 оноос эхлэн олгогдсон. 2021 он хүртэл олгосон зээлээс 3.2 их наяд төгрөгийн зээл чанаргүй болоод байна.  Мөн анхаарал хандуулах таван зээл байна. "Эрдэнэс Монгол, Эрчим хүчний яам, Ган-Хүдэр, Монгол Эм Импекс" зэрэг компанийн анхаарал хандуулах зээл бий.  Хэвлэл мэдээллээр Хөгжлийн банкны зээлийн асуудал яригдснаас хойш  21 аж ахуйн нэгж 48.9 тэрбум төгрөгийн төлөлт хийгээд байна.