ХБ-ны асуудлаар цагдан хоригдоод буй "НВЦ" Ц.Баатарбилэг араасаа олон улс төрчийг дагуулж магадгүй байна

Хөгжлийн банкны чанаргүй зээлдэгчдийг АТГ-аас шалгаж, нэр бүхий 12 хүнийг цагдан хорих саналыг шүүхэд хүргүүлсэн. Тэдний нэг “НВЦ” компанийн гүйцэтгэх захирал Ц.Баатарбилэгийг хорих эсэх асуудлыг Баянзүрх, Чингэлтэй, Сүхбаатар дүүргийн шүүхээр өчигдөр/2022.02.21/ хэлэлцэж цагдан хорих шийдвэр гаргаад байна.

“НВЦ” компани нь Төв аймгийн Баянчандмань суманд шувууны аж ахуйн чиглэлээр төсөл хэрэгжүүлэхээр 2017 онд 21 сая ам.долларын зээл авч, өнөөдрийн байдлаар зээлийн үлдэгдэл 74 тэрбум. Тус компани зээлийг зориулалтын бусаар ашигласан, барьцаа хөрөнгө хангалтгүй зэрэг асуудалтайн дээр авлига хээл хахуулийн асуудлаар эрүүгийн хэрэг үүсгэгдэн шалгагдаж байгаа юм. АТГ-аас 2019 онд Ц.Баатарбилэгт эрүүгийн хэрэг үүсгэн шалгаж, тухайн үед хойшлуулшгүй ажиллагааны хүрээнд цагдан хорих хүртэл арга хэмжээг авч байсан. Мөн түүнд давуу байдал олгон их хэмжээний зээл олгосон гэх үндэслэлээр Хөгжлийн банкны захирлаар ажиллаж байсан Б.Батбаярыг буруутгаж, эрүүгийн хуулийн 22.1 дэх хэсэгт зааснаар яллагдагчаар тооцож байсан юм.
Дашрамд дурдахад "НВЦ" Ц.Баатарбилэгт холбогдох хэрэг араасаа олон улс төрчдийг дагуулж магадгүй байна.