“е-Mongolia” системээр оюутан цэргийн бүртгэлийг гуравдугаар сарын 1-10-ны хооронд явуулна

Өнөөдөр /2022.02.22/  Цахим хөгжил, харилцаа холбооны яамнаас "Оюутан цэрэг" хөтөлбөрийн бүртгэл “Е-Mongolia” системээр явуулах болсон тухай мэдээллээ. 

Ирэх гуравдугаар сарын 1-нд “Оюутан цэрэг"-ийн бүртгэлийг цахимаар буюу “e-Mongolia”-аар дамжуулан гуравдугаар сарын 10-ны өдөр хүртэл авахаар боллоо. Батлан хамгаалах яамны зүгээс 2022 оны нэгдүгээр сард цэргийн бүртгэлийн улс орон даяар амжилттай зохион байгуулж, нийтдээ 100,000 гаруй иргэн цахимаар амжилттай цэргийн бүртгэлээ хийлгэсэн байна. 

Монгол Улсын Засгийн газар харилцаа холбоо, мэдээллийн технологийг эдийн засгийн тэргүүлэгч салбарын нэгээр тодотгож, “Цахим Үндэстэн” болох уриалгыг дэвшүүлж буй.  2022 он гарсаар “Е-Mongolia” системд төрийн 60 байгууллагын 624 үйлчилгээг оруулсан бөгөөд иргэд давхардсан тоогоор 8.5 сая гаруй үйлчилгээг цахимаар авсан байна.