Мон цемент, МАК цементийн үйлдвэрүүдийг улсын комисст хүлээлгэж өгөөгүйн цаад шалтгаан

Монполимет ХХК  болон МАК цемент ХХК-ийн төслүүд амжилттай хэрэгжсэн ч тэд барьсан үйлдвэрээ улсын комисст хүлээлгэж өгдөггүй гэх мэдээлэл байгаа юм. Учир нь тэд Хөгжлийн банкны зээлээ төлөөгүй. Мөн Хөгжлийн банкинд үүссэн долларын зөрүүгээ Засгийн газраар буюу ард түмнээр төлүүлэхээр улайрч буй юм. Тиймээс баригдсан үйлдвэрээ Хөгжлийн банкны барьцаа болгохгүйн тулд Улсын комисст хүлээлгэж өгөхгүй байх аргыг хэрэглэж байж болзошгүй.

  “Монполимет” ХХК нь 2014 онд “цементийн үйлдвэр барих төсөл”-ийг хэрэгжүүлэхээр Хөгжлийн банкнаас 65 сая ам долларын зээлийг авсан байдаг. Тэгвэл өнөөдрийн байдлаар буюу 2022 оны 02 дугаар сарын байдлаар зээлийн үлдэгдэл 112.8 тэрбум байгаа бөгөөд Монголбанкны хяналт шалгалтаар хэвийн бус, анхаарал хандуулах зээлийн ангилалд орсон байна. Тус компанид ам долларын зээл олгосоноос 45 тэрбум төгрөгийн ханшийн алдагдалд орсон гэх мэдээлэл нь үнэн бодитой талаар Хөгжлийн банк тайлбарладаг.

“Мак цемент ХХК” нь УИХ гишүүн асан Н.Номтойбаярын хамаарал бүхий компани. Тус компани нь Хөгжлийн банкнаас 70.9 сая ам.долларыг 9.85 хувийн хүүтэй, 7 жилийн хугацаатай цементийн үйлдвэр барихаар авчээ.  Өнөөдрийн байдлаар “Мак цемент ХХК” нь 10.4 сая ам.долларын зөрчилтэй байна. “Мак цемент ХХК” нь  зөрчилөө арилгахгүй бол Хөгжлийн банк шүүхэд шилжүүлэхээр ажиллаж байгаа талаар мэдээлсэн билээ.