Хөгжлийн банкинд 117.9 тэрбумын өртэй Ц.Ууганбаярыг АТГ-аас цагдан хорьжээ

 "Нью Яармаг Хаусинг прожект" ХХК хөгжлийн банкинд 117.9 тэрбум төгрөгийн өр төлбөртэй. Тус компанийн гүйцэтгэх захирал Ц.Ууганбаяр бөгөөд тэрээр Монгол Улсын ерөнхийлөгч асан Х.Баттулгын орон тооны бус зөвлөхөөр ажиллаж байжээ. Ерөнхийлөгчийн гэр хорооллын барилгажилтын асуудал хариуцсан зөвлөхөөр ажиллаж байсан Ц.Ууганбаяр нь өмнө нь мөн Х.Баттулгыг Зам тээвэр, барилга хот байгуулалтын сайдын зөвлөхөөр ажиллаж байсан түүхтэй. Энэ нь түүнийг ерөнхийлөгч асан Х.Баттулгатай хамараал бүхий этгээд болохыг харуулдаг.

“Шинэ яармаг” орон сууцны хороолол барих төслийг хэрэгжүүлэхээр  "Нью Яармаг Хаусинг прожект" ХХК, “Төрийн орон сууцны корпораци” ТӨХХК хамтран 2015 оны 5 дугаар сарын 28-ны өдөр 142.4 тэрбум төгрөгийн зээл авсан бөгөөд 59.4 тэрбумыг л барагдуулжээ. Одоогийн байдлаар хуримтлагдсан өрийн хэмжээ 117.9 тэрбум бөгөөд 56 сарын хугацаа хэтрэлттэй явж байгаа юм.

Уг асуудалтай холбогдуулан Ц.Ууганбаярыг АТГ-аас хорих 461 дүгээр ангид цагдан хорьсон бөгөөд түүний шүүх хурал ирэх Даваа гаригт болох аж.

Ц.Ууганбаяр нь  33 настай  бөгөөд 19 настайгаасаа Х.Баттулгатай ойр харилцаатай байжээ. Тэрээр 14 жилийн хугацаанд Х.Баттулгын зөвлөхөөр ажиллаж байсан нь баримтуудаар нотлогддог.