Хөгжлийн банкны ажилчид өөрсөддөө нэг тэрбум төгрөгийн зээлийг давуу эрх олгож авчээ

АТГ-аас цагдан хорих санал хүргүүлээд буй Хөгжлийн банкны үе үеийн албан тушаалтнуудын тоонд багтаж буй гүйцэтгэх захирал асан Н.Мөнхбат/2012-2016 он/, ТУЗ-ийн дарга асан Б.Шинэбаатар/2012-2015 он/ нарын үед тус банк дотооддоо гаргасан хууль зөрчсөн шийдвэрүүдийн нэг нь  ажиллагсдадаа 1 тэрбум төгрөгийн зээл олгох шийдвэр гаргасан явдал. Тодруулбал тухайн үеийн ТУЗ нь өөрийн бүрэн эрхэд заагаагүй буюу ХБ-ны ажиллагсдад хөнгөлөлттэй зээл олгох шийдвэр гаргаж, арилжааны банкуудаар дамжуулан ажиллагсдад 1 тэрбум төгрөгийн зээл олгохыг зөвшөөрчээ.  

 Энэ нь “Нийтийн албанд нийтийн болон хувийн эрх ашгийг зохицуулах, ашиг сонирхлын зөрчлөөс урьдчилан сэргийлэх тухай” хууль болон Хөгжлийн банкны тухай хуулийн хэд хэдэн заалтыг зөрчсөн үйлдэл болохыг аудитын дүгнэлтээр тогтоожээ. Энэ дагуу дээрх шийдвэрийг цуцлах, банкинд байршуулсан хөрөнгөд хадгаламжийн хүүгээр хүү тооцуулах, ажиллагсдын зээлийг төрөөс хэрэгжүүлж буй 8 хувийн болон арилжааны банкны зээлийн үйлчилгээнд хамруулахаар албан шаардлагыг хүргүүлж байжээ.

Түүнчлэн энэ хугацаанд гарсан бас нэг зөрчил нь тус банкны хүний нөөцийг 2 дахин нэмэгдүүлсэн явдал юм. 2013 оны 12 дугаар сарын 31-ний байдлаар 62 албан хаагчтай ажиллаж байсан бол 2014 оны 10 дугаар сар гэхэд 112 албан хаагчтай болж, нэг жилийн хугацаанд хүний нөөцийг хоёр дахин нэмэгдүүлсэн байна. Энэ нь тус банкны удирдлагууд өөрийн ойрын хүмүүсээ ажилд томилсон, тэдгээр хүмүүстээ давуу байдал бий болгож бага хүүтэй зээл авах боломжийг олгосон гэж хардахаар байна.