Хөгжлийн банкнаас зээл авсан Говь ХХК-ийн барьцаа хөрөнгийн чанар 2 дахин буурчээ

Говь ХХК 2019 оны 6 дугаар сарын 14-ний өдөр Хөгжлийн банкнаас 82 тэрбум төгрөгийн зээл авч, нийт үлдэгдэл 75.5 тэрбум төгрөгтэй тэнцэж байна.

Тус компани Хөгжлийн банкны хэвийн зээлдэгчдийн жагсаалтад багтаж байгаа ч барьцаа хөрөнгийн хувьд асуудал үүсчээ. Тодруулбал, зээл авахдаа 367 мянган кг ноолуурыг 18 тэрбум төгрөгөөр үнэлж, мөн ирээдүйд бий болох 5.2 тэрбум төгрөгийн хөрөнгийг барьцаалсан байна. Тус компанийн барьцаа хөрөнгийг дахин үнэлэхэд барьцаа хөрөнгийн чанар 2 дахин буурсан гэж үзжээ.

“Ирээдүйд бий болох орлогыг барьцаалж зээл олгох” гэх дэлхийн хаана ч байхгүй жишгийг Хөгжлийн банк хэрэгжүүлсэн гэдгийг “Өөрөөр нь төлүүлье” хэлэлцүүлэгт оролцсон хуульч Д.Баттулга хэлж байсан юм.

Дашрамд дурдахад Хөгжлийн банкнаас зээл авсан компаниудын 25 хувь нь бодит барьцаагаар баталгаажаагүй буюу ирээдүйд бий болох орлого, дансы орлого, эргэлтийн хөрөнгө зэргийг барьцаалсан байгаа нь асуудал дагуулаад байгаа юм.