В.Путин Украйн руу дайрсангүй харин өрнөдийн сэтгүүлчдийн эфирийг баллажээ

Өнөөдрийг дайн эхлээгүй өдөр гэж зарлаж болно. АНУ-ын Ерөнхийлөгч Байден болон өрнөдийн мэдээллийн томоохон агентлагуудын “баталгаатай тагнуулын эх сурвалж”-аас авч, дэлхий дахинд зарлан анхааруулснаар бол өнөөдөр буюу хоёрдугаар сарын 16-нд Путин Украйн руу дайрч, Европ тивд дэлхийн хоёрдугаар дайнаас хойш хамгийн томд тооцогдох бүс нутгийн дайн эхлэх ёстой байлаа.

АНУ, Их Британийн удирдлагууд болон өрнөдийн бүх л хэвлэл мэдээллийн хэрэгслүүд бүр өнгөрсөн оны арваннэгдүгээр сараас хойш Орос дайрах өдрийг “гарцаагүй” товлоосоор өдийг хүрсэн. Иймдээ ч өөрсдийн зохиосон  дайн эхлэх өдөр гэгчид итгэсэн бололтой. Учир нь 15-аас 16-нд шилжих шөнө өөрсдийнх нь урьдчилсан зөгнөсний дагуу Путин Украйныг бөмбөгдөж, пуужингаар харваад олон мянган танкаа дайралтад оруулахыг онлайнаар харуулах гэж хүлээж өнгөрөөлөө.

Дайн эхлэх өдрийг товлох, Путины төлөвлөгөөг “илчлэхэд” маш их анхаарал хандуулсан “CNN” гэхэд л оросууд дайрах агшныг шууд эфирт харуулахын тулд Украйны цэргийн байрлалд дөрвөн ч тусгай сурвалжлах байг байршуулан хүлээсэн байна. “Reuters” агентлаг Оросын пуужин унах үеийг баримтжуулахын тулд Киев хотоос шууд нэвтрүүлэг явуулсан. Гэсэн хэдий ч тэдний хүлээлт талаар болж шууд эфирт дайн эхэлж байгааг харуулж чадсангүй. Өөрөөр хэлбэл Путин хороо санаа гаргаж Украйн руу дайралгүй шууд эфирийг нь баллаж хүлээлтийг нь талаар болгожээ.

Ингэснээр өрнөдийн мэдээллийн хэрэгслүүд төдийгүй Ерөнхийлөгч Байден нэлээд эвгүй байдалд оров. Хэвлэл мэдээллийн хэрэгслүүд тэр даруй Путин яагаад дайраагүй талаар тайлбар олсон төдийгүй дайралт хэзээ мөдгүй эхэлж магадгүй хэвээр байгаа тухай мэдэгдсэн. “CNN” гэхэд л Украйны намаг балчиг ихтэй хөрс дулаан өвлөөс болж гүйцэд хөлдөж амжаагүй тул Оросын танкнууд намаг шаварт суухаас болгоомжлоод дайраагүй гэж тайлбарлажээ.

Харин Ерөнхийлөгч Байден Америкийн болон Оросын ард түмэнд хандан үг хэлж, Украйны ээдрээг дипломат аргаар шийдэхээр тохиролцсон тухайгаа мэдэгдэв. Тэрээр Оросын ард түмэнд хандаж “Би оросын ард түмэнд хандаж, бид та нарын дайсан биш гэдгийг хэлье. Та нарыг маш гүн харилцаа холбоотой улс ба үндэстэн болох Украйны эсрэг сүйрэл дагуулсан цуст дайныг эхлүүлэхийг хүсэж байгаа гэдэгт итгэхгүй байна” гэжээ.

ОХУ нь Ерөнхийлөгчөөс эхлээд Гадаад хэргийн сайд, НҮБ-ын суурин төлөөлөгч гээд бүх л шатандаа бүр оноос Украйн руу дайрах төлөвлөгөө гаргаагүй, дайрах бодолгүй гэдгээ хэлсээр байгаа ч АНУ тэргүүтэй өрнөдийн улс орнууд тэднийг үгийг сонсохгүй өдийг хүрсэн. Энэ удаад ч бас сонсоогүй бололтой Байден нь Оросыг Украйн руу дайрч магадгүй хэвээр байгаа гэж хэлсэн байна.