Завхан аймгийн Засаг Даргын Тамгын Газрын Даргаар Г.Мягмарсүрэн томилогдлоо

Өнөөдөр хаврын тэргүүн сарын шинийн 15-ны билигт сайн өдөр аймгийн Засаг даргын Тамгын газрын дарга Л.Лхамсүрэн гавьяаныхаа амралтыг авч үүрэгт ажлаа Г.Мягмарсүрэнд хүндэтгэлтэйгээр хүлээлгэн өглөө.

Л.Лхамсүрэн нь төрийн албанд 30 гаруй жил ажилласнаас сүүлийн 22 жил удирдах албан тушаал хашсан төрийн жинхэнэ албан хаагч, Төрийн албаны тэргүүний ажилтан юм. Түүнийг аймгийн Засаг даргын Тамгын газрын даргаар ажилласан 5 жил 5 сарын хугацаанд Завхан аймаг АТГ-ын шударга байдлын үнэлгээгээр улсад хоёр жил дараалан тэргүүлсэн, аймгийн Төрийн албаны салбар зөвлөл ажлаараа улсад тавдугаар байр, Завхан аймаг ажлаараа улсад зургаадугаар байр эзэлж, 2021 онд төрийн албаны шалгалтыг хуулийн дагуу амжилттай зохион байгуулсан шилдэг таван аймгийн нэгээр тус тус шалгарсан зэрэг олон амжилтыг үзүүлсэн юм. Мөн төрийн албаны тухай хуулийн шинэчилсэн найруулгын дагуу төрийн албаны шинэтгэлийг орон нутагт манлайлан хэрэгжүүлсэн билээ.

Тэрээр төриийн бодлого шийдвэр, хуулийн хэрэгжилтийг маш сайн хангаж ажиллах талаар залуу боловсон хүчинд захиас сургамжаа хэлж, төрийн тамгыг гүн хүндэтгэлтэйгээр гардууллаа.

Г.Мягмарсүрэн нь төрийн захиргааны менежер, философи, нийгмийн ухааны багш мэргэжилтэй. Төрийн албанд 12 жил ажилласнаас ахлах түшмэлийн албан тушаал буюу аймгийн Гэр бүл, хүүхэд залуучуудын хөгжлийн газрын даргаар сүүлийн 9 жил ажиллаж байгаад ийнхүү өнөөдөр /2022-02-16/ аймгийн Засаг даргын Тамгын газрын даргаар томилогдлоо.

Тэрээр төрийн бодлого шийдвэр, хуулийн хэрэгжилтийг хангахад онцгойлон анхаарч монгол төрд хоёргүй сэтгэлээр зүтгэнэ гэдгээ илэрхийллээ.